भाजपने पोट निवडणुकीतून माघार घेतल्यानंतर शरद पवारांची पहिली प्रतिक्रिया; म्हणाले, माझी मागणी नव्हती...

भूषण शिंदे -

मुंबई : अंधेरी विधानसभा पोटनिवडणुकीत भाजप आणि शिंदे गटाने माघार घेतली असून भाजप प्रदेशाध्यक्ष चंद्रशेखर बावनकुळे (Chandrasekhar Bawankule) यांनी उमेदवार मुरजी पटेल यांचा अर्ज परत घेण्याची घोषणा केली. भाजपने या निवडणुकीमधून माघार घेतल्यानंतर शरद पवार (Sharad Pawar) यांनी भारतीय जनता पार्टीने ऐकलं ही चांगली गोष्ट असल्याचं म्हटलं आहे. (Andheri Assembly by-election)

दरम्यान, या पोट निवडणुकीच्या पार्श्वभूमीवर शरद पवारांनी वाय बी चव्हाण सेंटर येथील पत्रकार परिषदेत भाष्य केलं. यावेळी बोलताना पवार म्हणाले, एक जरी अपक्ष राहिला तर निवडणूक होईल. माझी मागणी नव्हती तर सल्ला होता. कोणाच्याही सांगण्याने झालं असेल तरी माझी हरकत नाही, असं म्हणत त्यांनी राज ठाकरेंच्या (Raj Thackeray) पत्रावर देखील प्रतिक्रिया दिली.

पाहा व्हिडीओ -

पवार पुढे म्हणाले, जे गृहस्थ गेले त्यांच्या पत्नीला उमेदवारी दिली तर अशा प्रकारे आपण पोटनिवडणुक बिनविरोध करतोच. मात्र, हे असे निर्णय पटकन होत नसतात त्याला वेळ हा लागतोच. MCA असुदे किंवा अन्य निवडणूक असुदे, मी अनेक वर्ष राजकारणात आहे आणि मी तर तिथे उभा नाही. आता जे अर्ज बाकी आहेत ते कोण आहेत हे आम्हाला माहित आहे. त्यामुळे पुन्हा आवाहन करणार नाही असंही पवार म्हणाले.

तर ग्रामपंचायत निवडणूक या चिन्ह आणि पक्षाच्या नावाने होत नाहीत. त्यामुळे याला काही अर्थ नाही. जिल्हा परिषद निवडणुकांमधून चित्र स्पष्ट होईल असंही ते म्हणाले. दरम्यान, आत्ताच्या राजकीय परिस्थितीवर बोलताना पवार म्हणाले, काँग्रेसमध्ये (Congress) आता गांधी परिवार व्यतिरिक्त निवडणूक होतेय ही चांगली गोष्ट आहे. मी सुद्धा निवडणूक लढलो होतो पण मी हरलो. मल्लिकार्जून खर्गे (Mallikarjun Kharge) संघटना दृष्टीने चांगला व्यक्ती आहे. अर्थात तो काँग्रेस चा प्रश्न आहे असंही पवार म्हणाले.