Ram Shinde : ठरलं! राम शिंदे यांना भाजपकडून मोठी जबाबदारी, विधानपरिषद सभापती निवडणुकीसाठी अर्ज भरणार

मुंबई : राज्यातील विधानसभा निवडणुकीत महायुतीची त्सुनामीपुढे महाविकास आघाडीला मोठा दणका बसला. महाविकास आघाडीला ५० जागांच्या आत रोखण्यात महायुतीला यश आलं. त्यानंतर काही दिवसांपूर्वी मंत्रिमंडळाचा विस्तार झाला. या निवडणुकीत भाजपने १३२ जागा जिंकल्या. त्यामुळे विधीमंडळातील गणित बदललं आहे. त्यामुळे विधान परिषद सभापतीच्या निवडीकडे सर्वांचं लक्ष लागलं होतं. यादरम्यान, भाजप आता राम शिंदे यांना मोठी जबाबदारी देत आहे. राम शिंदे हे उद्या मंगळवारी विधानपरिषद सभापती निवडणुकीसाठी अर्ज भरणार आहेत.

विधानसभा निवडणुकीनंतर राहुल नार्वेकर यांची पुन्हा विधानसभा अध्यक्षपदी निवड झाली. त्यानंतर आता विधानपरिषदेच्या सभापतीपदी कोणाची वर्णी लागणार याकडे साऱ्यांचं लक्ष होतं. त्यानंतर आता विधानपरिषदेच्या सभापतिपदी राम शिंदे यांना संधी मिळणार आहे. भाजपकडून राम शिंदे यांचं नाव फायनल झालं आहे.

या हिवाळी अधिवेशनादरम्यानच भाजप आमदार राम शिंदे हे उद्या विधानपरिषद सभापतीसाठी अर्ज भरणार आहेत. ते उद्या भाजपकडून सकाळी १० वाजता अर्ज दाखल करणार आहेत. त्यामुळे विधानसभा निवडणुकीत पराभूत झालेल्या राम शिंदे यांचं पुनर्वसन होणार असल्याचं बोललं जात आहे. त्यामुळे राम शिंदे यांना मोठा दिलासा मिळणार आहे.

राम शिंदे यांनी पोस्टमध्ये काय म्हटलंय?

आमदार राम शिंदे म्हणाले, 'महाराष्ट्र विधान परिषद सभापती निवडणुकीसाठी माझी उमेदवारी घोषित केल्याबद्दल पंतप्रधान नरेंद्र मोदी,राज्याचे मुख्यमंत्री देवेंद्र फडणवीस,उपमुख्यमंत्री एकनाथ शिंदे, उपमुख्यमंत्री अजित पवार, गृहमंत्री अमित शहा, जे पी नड्डा , चंद्रशेखर बावनकुळे आणि राष्ट्रीय लोकशाही आघाडी आणि महायुतीचे सर्व नेत्यांचे मी मनापासून आभार मानतो. उद्या सकाळी नागपुरातील विधानभवनात १० वाजता उमेदवारी अर्ज दाखल करणार आहे'.