Maharashtra Politics : मोठी राजकीय घडामोड! राज ठाकरे अचानक उद्धव ठाकरेंच्या भेटीला, कारण काय?

मुंबई महापालिका निवडणुकीच्या पार्श्वभूमीवर राजकीय घडामोडींना वेग आला आहे. या निवडणुकीसाठी उद्धव ठाकरे आणि राज ठाकरे यांनी चांगलीच कंबर कसल्याचं पाहायला मिळतंय. मुंबईतील सत्ता राखण्याचं आव्हान ठाकरे बंधूंवर असणार आहे. त्यामुळे संपूर्ण देशाचं लक्ष मुंबई महापालिकेच्या निवडणुकीकडे लागलं आहे. याच आशियातील श्रीमंत महापालिकेसाठी निवडणुकीचा उमेदवारीचा अर्ज भरण्याचा आज शेवटचा दिवस होता. निवडणुकीसाठी अर्ज भरण्याचा अवधी संपुष्टात आल्यानंतर राज ठाकरे यांनी मातोश्रीवर जाऊन उद्धव ठाकरे यांची भेट घेतली. राज ठाकरे हे अचानक भेटीसाठी निघाल्यान राजकीय चर्चांना उधाण आलं आहे.

मुंबई महापालिका निवडणुकीत उद्धव ठाकरे यांनी मैदानात १६४ उमेदवार उभे केले आहेत. तर राज ठाकरे यांच्या मनसेने ५३ उमेदवार रिंगणात उभे केले आहेत. तर ठाकरे बंधूंनी शरद पवार गटाला 10 जागा सोडल्या. ठाकरे बंधूंनी शेवटच्या दिवसापर्यंत उमेदवारांची नावे गुलदस्त्यात ठेवली. दोन्ही पक्षांनी इच्छुक उमेदवारांना एबी फॉर्म देऊन बंडखोरी टाळण्याचा प्रयत्न केला. मात्र, तरीही मुंबईत काही ठिकाणी दोन्ही ठाकरे बंधूंना कार्यकर्त्यांच्या बंडखोरी आणि नाराजीला सामोरे जावं लागलं. मुंबईतील कार्यकर्त्यांच्या बंडखोरी आणि नाराजीनाट्यानंतर राज ठाकरे यांनी उद्धव ठाकरे यांच्या भेटीला पोहोचले.

दोघांमध्ये काय चर्चा झाली?

महापालिकेसाठी अर्ज भरण्याची मुदत संपल्यानंतर मनसे अध्यक्ष राज ठाकरे मातोश्रीवर पोहोचले. या भेटीत महापालिका निवडणुकीच्या प्रचारासंदर्भात दोन्ही नेत्यांमध्ये चर्चा होण्याची शक्यता आहे. मुंबईसह इतर महापालिकेतही दोन्ही ठाकरेंच्या पक्षांनी उमेदवार मैदानात उतरवले आहेत. त्यामुळे इतर महापालिका निवडणुकीबाबतही चर्चा होण्याची शक्यता आहे.

तत्पूर्वी, मुंबईतील काही वॉर्डात दोन्ही ठाकरेंच्या पक्षातील कार्यकर्त्यांमध्ये नाराजी पाहायला मिळाली. तर काही वॉर्डात बंडखोरी देखील पाहायला मिळाली. त्यामुळे पुढील काही दिवसांत दोन्ही नेते कार्यकर्त्यांची नाराजी कशी दूर करणार, हे पाहावे लागेल.