Pune : मोठी बातमी! पुण्यात ठाकरेसेना आणि काँग्रेसची युती, कोण किती जागा लढवणार?

अक्षय बडवे, पुणे

राज्याच्या राजकारणातील आताची सर्वात मोठी बातमी समोर आली आहे. पुणे महापालिकेच्या निवडणुकीसाठी काँग्रेस आणि उद्धव ठाकरेंच्या शिवसेनेची हात मिळवणी झाली आहे. हे दोन्ही गट एकत्ररित्या पुण्यातील महापालिकेच्या निवडणुकीसाठी लढणार आहेत. मात्र काँग्रेस आणि उद्धव ठाकरेंच्या शिवसेनेसोबत मनसे जायला तयार नसल्याचं म्हटलं जात आहे. काँग्रेस आणि उबाठा गटाच्या पुण्यातील युती नंतर दोन्ही गटाच्या जागावाटपाचा फॉर्म्युला जाहीर करण्यात आला आहे.

राज्यात महापालिकेच्या निवडणुका जाहीर झाल्यानंतर तब्बल २० वर्षांनंतर उद्धव ठाकरे आणि राज ठाकरे एकत्र आले. महापालिकेच्या निवडणुकीसाठी ठाकरे बंधू एकत्र आल्यांनतर, आता पुण्यातील महापालिका निवडणुकीसाठी ठाकरेंच्या शिवसेना गटाकडून काँग्रेसशी युती करण्यात आली आहे. या युतीत मनसेचा सहभाग नसल्याचं म्हटलं जात आहे.

आज झालेल्या पत्रकार परिषदेत काँग्रेस आणि उबाठा गटाच्या युतीबाबत घोषणा करण्यात आली. काँग्रेस आणि ठाकरेंच्या शिवसेनेच्या माध्यमातून पुण्याचे चांगले व्हावे यासाठी आम्ही एकत्र आलो असल्याचं सतेज पाटील यांनी म्हटलं आहे. शिवाय या पत्रकार परिषदेत काँग्रेस आणि उबाठा गटाकडे किती जागा देण्यात आल्या याबाबत भाष्य करण्यात आलं.

उबाठा गटाला ४५ जागा देण्यात आल्या आहेत. तर, ६० जागा काँग्रेसला देण्यात आल्या आहेत. मनसेकडून ३२ जागांची मागणी करण्यात आली पण शिवसेनेकडून २१ जागा दिल्या जात आहेत. त्यामुळे मनसेने काँग्रेस आणि ठाकरेंच्या शिवसेनेच्या युतीसोबत न जाण्याचा निर्णय घेतला आहे. दरम्यान शिवसेना मनसेसोबत चर्चा करणार असल्याचं बोललं जात आहे. आता हा जागा वाटपाचा तिढा सुटणार की वाढणार हे पाहणं महत्त्वाचं ठरेल.