अक्षय्य तृतीयेनिमित्त पुण्यातील वाहतुकीत बदल; 'हे' आहेत पर्यायी मार्ग

Pune Traffic News Update : अक्षय्य तृतीयेनिमित्त आज श्रीमंत दगडूशेठ हलवाई गणपती मंदिरात होणारी गर्दी विचारात घेऊन वाहतूक व्यवस्थेत बदल करण्यात आले आहेत. मध्यभागातील श्री छत्रपती शिवाजी महाराज रस्त्यावरील वाहतूक पर्यायी मार्गाने वळविण्यात येणार आहे.

"अक्षय्य तृतीयेनिमित्त श्रीमंत दगडूशेठ हलवाई गणपती मंदिरात भाविकांची दर्शनासाठी मोठी गर्दी होते. तसेच भगवान परशुराम जन्मोत्सवानिमित्त दुचाकी फेरी (रॅली) काढण्यात येणार आहे. ही गर्दी लक्षात घेऊन वाहतूक व्यवस्थेत बदल करण्यात येत आहेत. त्यामुळे वाहनचालकांनी पर्यायी मार्गांचा वापर करावा," असे आवाहन वाहतूक शाखेचे पोलीस उपायुक्त हिंमत जाधव यांनी केले आहे.

असे असतील बदल:

गर्दी ओसरेपर्यंत मध्यभागातील श्री छत्रपती शिवाजी महाराज रस्ता, लक्ष्मी रस्ता आणि परिसरातील रस्त्यांवरील वाहतुकीत बदल करण्यात येणार आहेत. अत्यावश्यक सेवा वगळता पीएमपी बस, तसेच अन्य वाहने पर्यायी मार्गाने वळविण्यात येतील. गर्दीच्या वेळी छत्रपती शिवाजी महाराज रस्ता वाहतुकीस बंद ठेवण्यात येणार आहे.

असे असतील पर्यायी मार्ग:

स्वारगेटकडे जाणारी वाहतूक: छत्रपती शिवाजी महाराज रस्त्यावरून स्वारगेटकडे जाणारी वाहतूक स. गो. बर्वे चौकातून (मॉडर्न कॅफे) जंगली महाराज रस्ता, झाशीची राणी चौक, डेक्कन जिमखाना, टिळक चौक आणि टिळक रस्ता मार्गे वळविण्यात येणार आहे.

पीएमपी बस मार्ग: महापालिका भवनाकडे जाणाऱ्या पीएमपी बस स. गो. बर्वे चौक, जंगली महाराज रस्ता आणि झाशीची राणी चौकामार्गे जातील.

बुधवार चौक मार्ग: आप्पा बळवंत चौकातून हुतात्मा चौकाकडे (बुधवार चौक) जाणारा मार्ग वाहतुकीस बंद राहील. या भागातील वाहतूक बाजीराव रस्त्याने वळविण्यात येईल.

गणेश रस्ता: लाल महाल चौकातून गणेश रस्त्याकडे जाणारी वाहतूकही पर्यायी मार्गाने वळविण्यात आली आहे.