Shaniwarwada Namaz Row: नमाजपठणवरुन महायुतीत जुंपली; मेधाताईंना अटक करण्याची ठोंबरेंची मागणी

पुण्यातील वाढती गुन्हेगारी राज्यात चर्चेचा विषय असतानाच आता शनिवारवाड्यातील नमाज पठणा वरुन राजकारण सुरु झालंय. शनिवारवाड्यामधील मजारवर चादर चढवून जागा बळकावण्याचा प्रयत्न सुरु असल्याचा आरोप भाजपने केलाय. मात्र यावर महायुतीतील मित्रपक्षांनीच आक्षेप घेत हल्लाबोल केलाय. भाजपच्या आंदोलनाला प्रत्युत्तर म्हणून राष्ट्रवादीने आंदोलन केलं. या मजारची 1936 साली पुरातन विभागात नोंद असून खासदार मेधा कुलकर्णी यांच्यामुळे सामाजिक सलोखा बिघडतोय, असा आरोप रुपाली ठोंबरे यांनी केलाय.

दुसरीकडे शिंदेसेनेनंही भाजपवर निशाणा साधलाय. कुणीही आपणच सरकार आहोत या थाटात वागू नये, असा टोला नीलम गो-हे यांनी लगावलाय. तर शनिवारवाडा प्रकरणावरून भाजपचे मंत्री नितेश राणेंनी संताप व्यक्त केलाय.

दरम्यान, शनिवारवाड्यातील नमाज पठण प्रकरणी विश्रामबाग पोलिसांनी गुन्हा दाखल केलाय.शनिवार वाड्यात नमाज पठण चालणार नाही, चलो शनिवार वाडा, अशी हाक देत मेधा कुलकर्णी यांनी रविवारी आंदोलन केलं होतं. गोमुत्र शिंपडून परिसराचं शुद्धीकरण केलं. ही मजार हटवण्यासाठी 8 दिवसांचा अल्टीमेटम हिंदुत्ववादी संघटनांनी दिलाय. शनिवारवाड्यासमोर आणि बाजूला पेशवेकालीन दर्गा आहे.

पेशव्यांना त्यांची अडचण नव्हती मग तुम्हाला का? असा सवाल विरोधक करतायेत. पालिका निवडणुका तोंडावर आल्याने मतांसाठी मुस्लिम धर्मीयांना दुखावण्याचं धाडस सत्ताधारी पक्ष करत नाहीत. त्यामुळेच नमाज पठणवरुन महायुतीत जुंपली आहे. आधीच वाढत्या गुन्हेगारीमुळे पुणे अशांत झालं आहे. आता ऐतिहासिक शनिवारवाडावरुन राजकारण तापू लागलं आहे. हा वाद कोणत्या वळणावर जाणार याकडे सगळ्यांचं लक्ष आहे.