Thackeray vs Shinde: शिंदे 'नरकासूर'; नरक चतुर्दशीवरून उद्धव ठाकरेंची एकनाथ शिंदेंवर विखारी टीका

नरक चतुर्दशीच्या निमित्तानं ठाकरेसेना आणि शिंदेसेनेतील राजकीय युद्ध पुन्हा एकदा भडकलयं. ठाकरेसेनेनं शिंदेंसेनेवर कठोर शब्दात हल्ला चढवलाय. नाशिकमधील भाजप कार्यकर्त्यांनी ठाकरेसेनेत प्रवेश केल्यानंतर नरकासुराचा वध करण्यासाठी तुम्ही शिवसेनेत आलात, असं विधान उद्धव ठाकरेंनी केलं. इतकचं काय नरकासुर कोण आहे हे वेगळं सांगण्याची गरज नाही, असं म्हणत ठाकरेंनी शिंदेंना अप्रत्यक्ष टोला लगावलाय.

दुसरीकडे नरकासुराचा उगम गुवाहाटीतून झाला त्यामुळे महाराष्ट्रातील या 'गद्दार नरकासुरां'चाही राजकीय अंत होईल, असा हल्लाबोल ठाकरेसेनेचे खासदार संजय राऊतांनी केलाय. दरम्यान शिंदेसेनेनंही ठाकरेसेनेच्या विधानांवर जोरदार टीका केलीय. महापालिका निवडणुकांसाठी आधीच राजकीय पक्षांनी कंबर कसलीय.

त्यातच ठाकरेसेना आणि शिंदेसेनेतील लढाई ही शाब्दिक टीकेपुरती मर्यादीत न राहता आता प्रतिष्ठेची झालीय. सत्तासंघर्ष तीव्र होताना दिसतोय. ठाणे, मुंबई, नाशिक, छत्रपती संभाजीनगर या ठिकाणी स्थानिक स्वराज्य संस्थांच्या निवडणुकीत दोन्ही पक्ष आमनेसामने उभे राहणार हे निश्चित.. त्यामुळे आगामी पालिका निवडणुकीत कोण कोणाला चितपट करतं. जनता कोणाच्या पाठिशी उभी राहते... आणि 'राजकीय नरकासुर' कोणता पक्ष ठरतो. हे पाहणं महत्त्वाचं आहे.