School Student : विद्यार्थ्यांसाठी मोठी बातमी! पुण्यात कडाक्याची थंडी, शाळांच्या वेळापत्रकात मोठा बदल, जाणून घ्या संपूर्ण माहिती

सचिन जाधव, पुणे

बंगालच्या उपसागरातील दितवाह चक्रीवादळ निवळल्यानंतर राज्यात थंडीचा गारवा वाढला आहे. सकाळी वातावरणात धुकं पाहायला मिळत आहे तर दुपारी उन्हाचा कडाका जाणवतं आहे. अशातच विद्यार्थ्यांसाठी महत्त्वाची बातमी समोर आली आहे. सकाळच्या गारठ्यात विद्यार्थ्यांना शाळेत जायला सुद्धा त्रास होत असल्याने विद्यार्थ्यांच्या शाळेच्या वेळांमध्ये देखील बदल करण्यात आला आहे. हा बदल विद्यार्थ्यांच्या आरोग्याचा विचार करून करण्यात आला आहे.

पुणे आणि आसपासच्या परिसरात गेल्या काही दिवसांपासून १० अंश सेल्सिअस पेक्षा कमी-अधिक किमान तापमानाची नोंद होत आहे. परिणामी सकाळी हुडहुडी भरविणारी थंडी जाणवत आहे. सकाळच्या वेळेत जाणवणाऱ्या थंडीमुळे विद्यार्थी गारठून जात आहेत. त्यामुळे शाळा व्यवस्थापनाने पुढाकार घेत विद्यार्थ्यांच्या आरोग्याच्या दृष्टीने वेळेतील बदल केला आहे. मध्यवर्ती भागातील काही शाळांनी नियोजित वेळापत्रकात बदल केला आहे. त्यामुळे आता शाळा नियोजित वेळेपासून २० ते ४० मिनिटे उशिराने भरत आहेत. तर, काही शाळा अद्यापही वेळापत्रकात आवश्यक तो बदल करण्याच्या प्रक्रियेत आहेत.

'अत्यंत थंडीत लहान मुलांना सकाळी उठवणे आणि शाळेत पाठवणे कठीण होत होते. शाळांनी वेळ बदलल्याने मोठा दिलासा मिळाला', अशी प्रतिक्रिया अनेक पालकांनी व्यक्त केली. मुलांच्या सुरक्षिततेसाठी आणि आरोग्य संरक्षणासाठी हे योग्य पाऊल असल्याचे सर्वसाधारण मत आहे. दरम्यान, हवामान विभागाने पुढील काही दिवस सकाळच्या वेळेत थंडीचा कडाका कायम राहण्याची शक्यता वर्तवली आहे. परिस्थिती आणखी बदलल्यास शाळांच्या वेळेत पुन्हा सुधारणा करण्याबाबत प्रशासन सज्ज असल्याचे शाळांकडून सांगण्यात आले.

सध्या सकाळच्या वेळेत थंडीचा कडाका वाढला असल्याने लहान मुलाच्या आरोग्याचा विचार करण अत्यंत आवश्यक आहे. याच काळात शाळेत स्नेहसंमेलन आणि विविध खेळांच्या स्पर्धा सुरू असल्याने विद्यार्थी कोणत्याही उपक्रमापासून वंचित राहू नयेत आणि त्यांची तब्येतही बिघडू नये, यासाठी शाळेच्या वेळेत किरकोळ बदल करण्याचा निर्णय घेतला असल्याचे शनिवार पेठेतील न्यू इंग्लिश मीडियम स्कूलने म्हटले आहे.