Pune : पुण्यात शाळेतील विद्यार्थ्याला मारहाण, कानशिलात लगावल्याने कानाला दुखापत; शिक्षिकेवर गुन्हा दाखल

सचिन जाधव, साम टीव्ही, प्रतिनिधी

Pune News : पुण्यात शाळेकरी विद्यार्थ्याला मारहाण केल्याप्रकरणी शिक्षिकेच्या विरोधात पोलीस स्टेशनमध्ये तक्रार दाखल करण्यात आली आहे. मुख्याध्यपिकांकडे तक्रार करुनही कारवाई करण्यात आली नाही, उलट मुलाला वर्गातून बाहेर काढण्यात आले असे मुलाच्या आईने म्हटले आहे. मारहाणीमुळे मुलाच्या कानाला दुखापत झाल्याचेही त्याच्या आईने पोलिसांना सांगितले.

मिळालेल्या माहितीनुसार, पुण्याच्या वाघोतील प्रसिद्ध चैतन्य टेक्नो स्कूल या शाळेत सातवीत शिकणाऱ्या विद्यार्थ्याला शिक्षिकेने मारहाण केली. या प्रकरणी विद्यार्थ्याच्या आईने वाघोली पोलिस ठाण्यात फिर्याद दिली आहे. फिर्यादीनंतर वाघोली पोलिसांनी कलम २९४५/२०२५ नुसार गुन्हा दाखल केला आहे. मारहाणीमुळे मुलावर वैद्यकीय उपचार सुरु असल्याचे त्याच्या पालकांनी म्हटले आहे.

फिर्यादीच्या म्हणण्यानुसार, ७ सप्टेंबर २०२५ रोजी सकाळी ७.३० च्या सुमारास त्यांच्या मुलाला महिला शिक्षिकेने कानशिलात लगावली. यामुळे त्याच्या कानाला दुखापत झाली. वेदना वाढल्याने त्याला तातडीने रुग्णालयात दाखल करण्यात आले. डॉक्टरांनी कानाला झालेल्या दुखापतीबाबत वैद्यकीय अहवाल दिला आहे. मुख्याध्यापिकांकडे तक्रार करुनही शिक्षिकेवर कारवाई झाली नाही.

१८ सप्टेंबर रोजी विद्यार्थ्याला एका खाजगी हॉस्पिटलमध्ये दाखल करण्यात आले. शाळेच्या शिक्षिकेच्या मारहाणीमुळे मुलाला शारीरिक जखमांसहल गंभीर मानसिक धक्का देखील बसला आहे. या घटनेमुळे त्याच्या आरोग्यावर परिणाम झाला आहे. तक्रारीनंतर वाघोली पोलीस महिला शिक्षिकेवर आणि शाळेवर कारवाई करणार का याकडे सर्वांचे लक्ष लागले आहे.