बुधवार पेठेत धक्कादायक प्रकार, पतीने केला पत्नीचा खून; एक मुलगा, दोन मुली पोरकी

विश्वभूषण लिमये, साम टीव्ही, प्रतिनिधी

Solapur : सोलापूरमधून एक धक्कादायक घटना उघडकीस आली आहे. एका व्यक्तीने त्याच्या पत्नीची निर्घुण हत्या केल्याची माहिती समोर आली आहे. कौटुंबिक वादातून ही घटना घडल्याचे म्हटले जात आहे. घटनेची माहिती मिळताच स्थानिक पोलीस आणि फॉरेन्सिक टीम घटनास्थळी दाखल झाली. त्यांनी प्रकरणाचा तपास सुरू केला आहे.

मिळालेल्या माहितीनुसार, सोलापूरच्या रमाबाई आंबेडकर नगर, न्यू बुधवार पेठ परिसरात ही धक्कादायक घटना घडली. यशोदा सुहास सिद्धगणेश (वय ३५ वर्षे) ही महिला आज (१४ ऑक्टोबर) सकाळच्या सुमारास गंभीर जखमी आणि बेशुद्ध अवस्थेत आढळून आली. महिलेला तातडीने शासकीय रुग्णालयात दाखल करण्यात आले.

सोलापूर येथील सिव्हिल रुग्णालयात दाखल केल्यानंतर डॉक्टरांनी यशोदा सिद्धगणेश या महिलेला मृत घोषित केले. या घटनेने परिसरात एकच खळबळ उडाली, त्यानंतर यशोदा यांच्या नातेवाईकांनी रुग्णालयात मोठी गर्दी करून आक्रोश केला. या महिलेची हत्या तिच्या पतीने केल्याची प्राथमिक माहिती मिळाली आहे.

रमाबाई आंबेडकर नगर, न्यू बुधवार पेठ परिसरात यशोदा बेशुद्ध अवस्थेत आढळून आली होती. तिच्या शरीरावर मारहाणीच्या जखमा होत्या, ती गंभीररित्या जखमी होती. कौटुंबिक वादातून तिची हत्या तिच्याच पतीने, सुहासने केल्याचा अंदाज व्यक्त केला आहे. यशोदा आणि सुहास या दांपत्याला दोन मुली आणि एक मुलगा अशी तीन अपत्ये आहेत.