Pune Accident : पुण्यात भीषण अपघात, इंजिनिअरने २ दुचाकींना उडवले, दोघांचा जागीच मृत्यू, पती-पत्नी गंभीर जखमी

Pune Saswad road accident updates : पुण्याजवळ सासवड-वीर रस्त्यावर एका मद्यधुंद कारचालकाने २ दुचाकींना जोरात धडक दिली. वळणावर झालेल्या या अपघातात २ जणांचा जागीच मृत्यू झाला, तर पती-पत्नी गंभीर जखमी झाले आहेत. जखमींवर जवळच्या रुग्णालयात उपचार सुरू आहेत. मिळालेल्या माहितीनुसार, कारचालक प्रचंड दारूच्या नशेत होता. त्यामुळे त्याचे कारवरील नियंत्रण सुटले अन् २ दुचाकींना जोरात धडक दिली.

पुरंदर येथील पांगारे येथील रवींद्र गोपाळ काकडे (वय ६५) आणि महेंद्र संपत काकडे (वय ५३) या दोघांचा सासवड भीषण अपघातात मृत्यू झाला. तर तुकाराम जयवंत पोमण (वय ६०) आणि सुरेखा तुकाराम पोमण (वय ५०, रा. पिंपळे) हे गंभीर जखमी झाले आहेत. सासवड अपघात प्रकरणी पोलिसांनी आरोपी चालक अक्षय सुहास परब याला अटक केली आहे. मिळालेल्या माहितीनुसार, कारचालक अक्षय हा सध्या हडपसर येथे राहत असून तो सिव्हिल इंजिनिअर म्हणून कार्यरत आहे. तो मुंबईतील गोरेगाव येथील रहिवासी आहे, असे सासवड पोलीस ठाण्याचे उपनिरीक्षक परमेश्वर गोडसे यांनी सांगितले.

सासवड अपघात प्रकरणाची प्रकाश काकडे यांनी पोलिसांत तक्रार दिली आहे. आरोपी अक्षय आपल्या कारने (एमएच ४७ सीडी ७७०८) वीर बाजूकडून सासवडकडे भरधाव वेगात येत होता. मद्यधुंद अवस्थेत असलेल्या अक्षयने वळणावर समोरून येणाऱ्या काकडे आणि पोमण यांच्या दुचाकींना जोरदार धडक दिली. यात दोघांचा मृत्यू झाला तर दोघे गंभीर जखमी झाले आहेत. या घटनेमुळे परिसरात शोककळा पसरली आहे. पुढील तपास सासवड पोलीस करत आहेत.

अपघातानंतर कार चालक अक्षय परब याला अटक केली. तो दारूच्या नशेत असल्याचे आढळले. त्याला कोर्टात हजर केले असता १४ दिवसांची न्यायालयीन कोठडी सुनावण्यात आली आहे. तो सध्या येरवडा कारागृहात असून पोलिसांकडून त्याची चौकशी केली जात आहे, असे एका अधिकाऱ्याने सांगितले.