पुणे हादरले! बस स्टँडवर तरुणीसमोर माथेफिरूचे हस्तमैथुन; तरुणीने व्हिडिओ बनवला अन्...

गोपाल मोटघरे | पिंपरी चिंचवड प्रतिनिधी | साम टीव्ही मराठी

Pimpri Chinchwad latest crime news : पिंपरी-चिंचवड शहरातून एक अत्यंत संतापजनक आणि लज्जास्पद घटना समोर आली आहे. शहरातील सेंट मदर तेरेसा उड्डाणपुलावरील बीआरटी (BRT) बस स्थानकावर एका माथेफिरू तरुणाने तरुणीसमोर अश्लील चाळे करत तिचा विनयभंग केला. एका खाजगी कंपनीत कामाला जाणाऱ्या तरुणीसमोर सार्वजनिक ठिकाणी हा किळसवाणा प्रकार घडला. पीडित तरुणीने दाखवलेल्या धैर्यामुळे आणि पोलिसांनी केलेल्या तत्पर कारवाईमुळे अखेर या नराधमाला बेड्या ठोकण्यात आल्या आहेत. या घटनेमुळे महिलांच्या सुरक्षेचा प्रश्न पुन्हा एकदा ऐरणीवर आला आहे.

ही धक्कादायक आणि संतापजनक घटना २१ मे रोजी सकाळी पावणे आठ वाजण्याच्या सुमारास सेंट मदर तेरेसा उड्डाणपुलावरील एम्पायर इस्टेट बीआरटी बस स्थानकावर घडली. पीडित २१ वर्षीय तरुणी एका खाजगी कंपनीत कामाला असून, ती नेहमीप्रमाणे कामावर जाण्यासाठी बीआरटी बस स्थानकावर बसची वाट पाहत थांबली होती.

सकाळची वेळ असल्याने बस स्थानकावर प्रवाशांची गर्दी कमी होती. याचाच फायदा घेत तिथे आधीपासूनच लोखंडी बाकावर बसलेल्या एका माथेफिरू तरुणाने तरुणीला पाहून अश्लील चाळे करण्यास सुरुवात केली. त्याने तरुणीसमोर हस्तमैथुन करून सार्वजनिक ठिकाणी तिच्या मनास लज्जा उत्पन्न होईल असे किळसवाणे कृत्य केले.

तरुणीने मोबाईल कॅमेऱ्यात कैद केला प्रकार

या धक्कादायक प्रकारामुळे सुरुवातीला घाबरलेल्या तरुणीने नंतर अत्यंत धाडस दाखवले. तिने तात्काळ आपला मोबाईल काढून या माथेफिरूचे कृत्य कॅमेऱ्यात कैद केले. तरुणीने त्याला जाब विचारण्याचा प्रयत्न केला असता, त्या तरुणाने तरुणीला धमकावले आणि तिथून पळ काढला.

आरोपी जाकीर शेख पोलिसांच्या ताब्यात

या विकृत प्रकारानंतर तरुणीने थेट पिंपरी पोलीस ठाण्यात धाव घेत तक्रार दाखल केली. तरुणीने दिलेल्या पुराव्यांच्या आणि मोबाईल फुटेजच्या आधारे पिंपरी पोलिसांनी तातडीने तपास चक्र फिरवली. पोलिसांनी सार्वजनिक ठिकाणी हे किळसवाणे कृत्य करणाऱ्या जाकीर शेख याच्या मुसक्या आवळल्या असून त्याला अटक केली आहे. या संपूर्ण घटनेचा आढावा घेतला आहे.