Pune News: महिलांच्या बाथरूममध्ये डोकावून पाहायचा; तरूणीचं लक्ष गेलं अन् रंगेहाथ पकडलं

सागर आव्हाड, साम टीव्ही

पुणे शहरातील विमाननगर परिसरातील एका खाजगी कंपनीत महिलांच्या स्वच्छतागृहात डोकावणाऱ्या सफाई कामगाराचा धक्कादायक प्रकार उघड झाला आहे. एका तरुणीने प्रसंगावधान राखत आरोपीला रंगेहाथ पकडून पोलिसांच्या स्वाधीन केले. याप्रकरणी विमानतळ पोलीस ठाण्यात गुन्हा दाखल करण्यात आला आहे.

अनिल दुकाळे (वय वर्ष २५) असे आरोपीचे नाव आहे. आरोपी खाजगी कंपनीतील स्वच्छतागृहात जाऊन तरूणींना लपून पाहायचा. एका २३ वर्षीय तरुणीने पोलिसांकडे दिलेल्या फिर्यादीनुसार, २६ एप्रिल रोजी मध्यरात्री साडेबारा वाजण्याच्या सुमारास तरूणी स्वच्छतागृहात गेली. यावेळी स्वच्छतागृहातील लाईट गेल्याचं आढळले.

लाईट सुरू केल्यानंतर तिला स्वच्छतागृहात कुणीतरी लपल्याचे लक्षात आले. दुकाळे हा आत लपून बसलेला होता आणि डोकावून पाहत असल्याचे दिसताच तरुणीने आरडाओरडा केला. त्यानंतर तत्काळ अन्य कर्मचारी तिथे पोहोचले आणि दुकाळेला पकडून विमानतळ पोलिसांच्या स्वाधीन केले. आरोपी अनिल दुकाळे मागील ३–४ महिन्यांपासून त्या कंपनीत सफाई कामगार म्हणून काम करत असल्याची माहिती समोर आली आहे.

पोलिसांनी आरोपीला अटक करत त्याची चौकशी केली. पोलिसांनी आरोपीविरोधात कलमान्वये गुन्हा दाखल केला आहे. या प्रकरणाचा अधिक तपास पोलीस उपनिरीक्षक रवींद्र ढावरे करीत आहेत. या घटनेनंतर खासगी कंपनीत खळबळ उडाली असून, कंपनीतील महिलांमध्ये भीतीचे वातावरण निर्माण झाले आहे.