Pune Zika Virus: पुणेकरांनो काळजी घ्या! झिकाच्या रुग्णात झपाट्याने वाढ, रुग्णसंख्या ४८ वर

सचिन जाधव, पुणे

पुण्यामध्ये झिकाच्या (Pune Zika Virus) रुग्णांमध्ये झपाट्याने वाढ होत आहे. झिका रुग्णांची संख्या दिवसेंदिवस वाढत चालली आहे. त्यामुळे पुणेकरांचे टेन्शन आणखी वाढले आहे. पुण्यामध्ये झिकाचे आणखी ९ रुग्ण आढळून आले आहेत. त्यामुळे पुण्यातील झिका रुग्णांची संख्या ४८ वर पोहचली आहे. अशामध्ये पुणेकरांनी काळजी घ्यावी असे आवाहन पालिकेकडून केले जात आहे. पुणे महानगर पालिकेकडून उपाययोजना देखील केल्या जात आहेत.

मिळालेल्या माहितीनुसार, पुण्यात झिकाचे रुग्ण वाढले आहेत. आणखी ९ रुग्णांना झिकाची बाधा झाल्याचे तपासणी अहवालात आढळून आले आहे. त्यामुळे आता बाधित रुग्णांची संख्या ही ४८ झाली आहे. ९ रुग्णांपैकी ७ रुग्ण पुणे महापालिका हद्दीतील वाघोलीमधील आहेत. तर पुणे ग्रामीण आणि पुणे कँटोन्मेंट बोर्ड क्षेत्रात प्रत्येकी एक रुग्ण आढळला आहे.

पुणे जिल्ह्यात झिकाच्या रुग्णांमध्ये मोठी वाढ झाली. पुण्यात ९ नवे रुग्ण आढळल्याने बाधितांची संख्या आता ४८ वर पोहोचली आहे. शहरात ४६ तर पुणे ग्रामीण आणि कॅन्टोन्मेंट बोर्डमध्ये प्रत्येकी १ अशी ४८ रुग्णसंख्या झाली आहे. पुणे महानगरपालिकेच्या आरोग्य विभागाने ही माहिती दिली आहे.

या नव्या रुग्णांमध्ये शिवणे येथील २५ वर्षीय गर्भवती महिलेचा समावेश आहे. या महिलेला ताप, पुरळ, अंगदुखी आणि डोकेदुखी अशी लक्षणे आढळल्याने तिचे नमुने २२ जुलै रोजी नॅशनल इन्स्टिट्यूट ऑफ व्हायरॉलॉजीकडे (एनआयव्ही) पाठविण्यात आले होते. ही महिला २० आठवड्यांची गर्भवती आहे. अशामध्ये या नव्या रुग्णांच्या संपर्कात आलेल्या व्यक्तींची देखील रक्त तपासणी केली जात आहे. पुणे महानगर पालिकेच्या आरोग्य विभागाने नागरिकांना आणि गर्भवती महिलांनी विशेष काळजी घेण्याचे आवाहन केले आहे.