Pune News : पुण्यात बुलडोझर पॅटर्न! महापालिकेने २४ अनधिकृत इमारती पाडल्या

सचिन जाधव, साम टीव्ही

Pune News : पुणे महापालिकेने हवाई दलाच्या प्रतिबंधित क्षेत्रातील २४ इमारतीवर कारवाई केली आहे. लोहगाव नवीन हद्दीमध्ये हवाई दलाने प्रतिबंधित केलेल्या ९०० मीटरच्या बॉम्बेडंप भागातील बांधकामावर महापालिकेने बुलडोझर चढवला. या भागातील २४ इमारती पाडून टाकून सुमारे ४८ हजार चौरस मीटरवरील अनधिकृत बांधकाम पाडून टाकले आहेत.

लोहगाव विमानतळ हवाई दलासाठी सुरक्षेच्या दृष्टीने महत्त्वाचे आहे. या विमानतळाच्या परिसरात बांधकामे होऊ नयेत. यासाठी केंद्र शासनाची नियमावली आहे. जी बांधकामे झाली आहेत, ती पाडून टाकण्यासाठी जिल्हाधिकारी कार्यालयाच्या माध्यमातून महापालिकेने सर्वेक्षण सुरु केले आहे. त्यामुळे हा मुद्दा ज्वलंत असताना त्यातच महापालिकेने बफर झोन भागात सुरू असलेल्या अनधिकृत बांधकामावर जोरदार कारवाई केली.

बांधकाम विभागाने २४ जणांना नोटीस बजावली होती. त्यावर मंगळवारी कारवाई करत सुमारे ४८ हजार चौरस फुटाचे बांधकाम पाडून टाकण्यात आले. यामध्ये जेसीबी, जॉ कटर या मशिनचा वापर करण्यात आला आहे. या कारवाईमुळे नव्याने बांधकाम केलेल्या नागरिकांचे मोठे नुकसान झाले आहे.