Pune : पुणेकरांसाठी खुशखबर! आणखी एक डबल डेकर उड्डाणपूल होणार, मुंढवा-खराडी ट्रॅफिकची कटकट संपणार

Pune Double Decker Flyover News पुण्यात ८ मार्च रोजी सावित्रीबाई फुले पुणे विद्यापीठ चौकातील बहुप्रतीक्षित एकात्मिक दुमजली उड्डाणपुल सुरु करण्यात आला. त्यानंतर आता मुंढवा, केशवनगर ते खराडी बायपास या रस्त्यावरील महात्मा फुले चौकात दुमजली उड्डाणपूल उभारण्यात येणार आहे. या प्रक्रल्पामुळे अत्यंत वर्दळीच्या व सतत वाहतूक कोंडी होणाऱ्या या रस्त्यावरील ये जा करणाऱ्या प्रवाशांना दिलासा मिळणार आहे.

या दुपदरी उड्डाणपुलाच्या प्रस्तावाला स्थायी समितीने मंगळवारी मान्यता दिल्याची माहिती स्थायी समितीचे अध्यक्ष श्रीनाथ भिमाले यांनी पत्रकार परिषदेत दिली. या पुलामुळे मुंढवा, केशवनगर, खराडी बायपास परिसरातील सततची कोंडी दूर होणार आहे. तसेच प्रवाशांचा प्रवास देखील वेगाने होणार आहे.

मुख्यमंत्री देवेंद्र फडणवीस यांनी प्रकल्पांचे बांधकाम लवकर पूर्ण करण्याच्या सूचना दिल्या आहेत. त्यानुसार पावसाळ्याचा कालावधी वगळून २४ महिन्यांत हे काम पूर्ण केले जाणार असल्याचे स्थायी समितीचे अध्यक्ष श्रीनाथ भिमाले पत्रकार परिषदेत म्हणाले. पुण्यात मेट्रोचं जाळ अधिक विस्तृत होत आहे. अशातच मेट्रोला पुणेकरांची पसंती मिळत असून, मेट्रोच्या विस्तारित मार्गिकांनाही आता मान्यता देण्यात आली आहे.

मुंढवा, केशवनगर ते खराडी मार्गावरही मेट्रो प्रस्तावित आहे. त्यामुळे महामेट्रोशी चर्चा करून या पुलात मेट्रोचाही अंतर्भाव केल्याचे भिमाले पत्रकार परिषदेत म्हटलं. उड्डाणपुलाचा खर्च, वस्तू व सेवा कर, रॉयल्टी फी व गुणवत्ता तपासणी आदीसह तडजोडीने १२६ कोटी ६३ लाख ३६,१०३ रुपयांच्या निविदेला मान्यता देण्यात आली आहे. नळस्टॉप येथील पुलाच्या धर्तीवर हा एकात्मिक दुमजली उड्डाणपूल असेल. पहिल्या स्तरावरून वाहने, तर दुसऱ्या स्तरावरून मेट्रो धावेल, असे प्रकल्प विभागप्रमुख दिनकर गोजारे यांनी सांगितले.