Pune: पुणे-नाशिक महामार्ग २२ तास रोखून धरला, रास्तारोको करणाऱ्या २५० जणांविरोधात गुन्हा

Summary -

• शिरूर तालुक्यात बिबट्याच्या हल्ल्यामुळे संतप्त नागरिकांनी महामार्ग रोखला

• तब्बल २२ तास पुणे–नाशिक महामार्गावर रास्तारोको करण्यात आला

• मंचर पोलिसांनी २५० जणांवर गुन्हा दाखल केला

रोहिदास गाडगे, पुणे

पुणे जिल्ह्यातल्या शिरूरमध्ये बिबट्याने धुमाकूळ घातला आहे. बिबट्या नागरिकांवर हल्ले करत जीव घेत आहेत. शिरुर तालुक्यातील पिंपरखेड येथे रोहन बोंबे या मुलाचा बिबट्याने जीव घेतला होता. बिबट्यांचे हल्ले रोखण्यात वन विभागाला यश येत नसल्याने आणि त्यांच्याकडून काहीच उपाययोजना केली जात नसल्यामुळे संतप्त झालेले नागरिक आक्रमक झाले होते. बिबट्याच्या हल्ल्याच्या निषेधार्थ मंचर येथे पुणे -नाशिक महामार्गावर रास्तारोको करण्यात आला होता. याप्रकरणी २५० जणांविरोधात गुन्हा दाखल करण्यात आला आहे.

मिळालेल्या माहितीनुसार, शिरुर तालुक्यातील पिंपरखेड येथे रोहन बोंबे या मुलाचा बिबट्याच्या हल्ल्यात मृत्यू झाला होता. या घटनेच्या निषेधार्थ आणि बिबट मुक्त परिसर व्हावा या मागणीसाठी नागरिकांनी पुणे- नाशिक महामार्गावर रास्तारोको आंदोलन केले होते. तब्बल २२ तास महामार्ग रोखून धरला होता. या आंदोलनावेळी मोठी वाहतूक कोंडी निर्माण झाली होती.

महामार्गावर रास्तारोको आंदोलन करणाऱ्या देवदत्त निकम, सुरेश भोर, अरुण गिरे यांच्यासह २५० जणांवर मंचर पोलिस ठाण्यात गुन्हा दाखल करण्यात आला आहे. या प्रकरणी बेकायदेशीर जमाव जमवणे, रास्तारोको करणे, सार्वजनिक कार्यात अडथळा निर्माण करणे अशा विविध कलमांतर्गत पोलिसांत गुन्हा दाखल करण्यात आला आहे. पिंपरखेड आणि जांबुत परिसरात अवघ्या २० दिवसांत बिबट्याच्या हल्ल्यात ३ जणांचा जीव गेला.