Pune News : पुण्यात पुन्हा कोयता गँगच्या गुंडांची दहशत; भररस्त्यात तरुणाला मारहाण, १४ हजारांची रोकड लुटली

सागर आव्हाड, साम टीव्ही

पुणे शहरात पुन्हा एकदा कोयता गँगच्या गुंडांनी धुमाकूळ घालण्यास सुरुवात केली आहे. दारू पिण्यासाठी पैसे न दिल्याच्या रागातून कोयता गँगच्या गुंडांनी एका तरुणाला भररस्त्यात मारहाण केली आहे. इतकंच नाही तर, कोयत्याचा धाव दाखवून गुंडांनी तरुणाची १४ हजार रुपयांची रोकड देखील लुटून नेली. हा धक्कादायक प्रकार गुलटेकडी भागातील मीनाताई ठाकरे वसाहतीत घडला.

याप्रकरणी तरुणाने दिलेल्या फिर्यादीवरून पोलिसांनी (Police) दोघांविरोधात गुन्हा दाखल केलाय.अमन शाकीर शेख (वय १९, रा. मीनाताई ठाकरे वसाहत, गुलटेकडी) आणि त्याच्या साथीदार अशी गुन्हा दाखल झालेल्या आरोपींची नावे आहेत. सध्या पोलिसांकडून दोन्ही आरोपींचा शोध घेतला जात आहे.

मिळालेल्या माहितीनुसार, तक्रारदार तरुण हा मीनाताई ठाकरे वसाहतीमधील एकदिल मित्रमंडळाजवळ आला होता. यावेळी दोन्ही आरोपींनी त्याची वाट अडवली. तसेच शिवीगाळ (Crime) करत त्याच्याकडे दारू पिण्यासाठी पैसे मागितले. तरुणाने पैसे देण्यास नकार दिल्यानंतर आरोपींनी त्याला मारहाण केली.

एवढ्यावरच न थांबता आरोपींनी कोयत्याचा धाक दाखवून तरुणाच्या खिशातील १४ हजार रुपयांची रोकड लुटली. या घटनेचे मोबाइलमध्ये चित्रीकरण करताना आरोपींनी कोयत्याने तरुणाचा मोबाइल देखील फोडला. तरुणाने आरडाओरड केल्यानंतर परिसरातील नागरिक जमा झाले.

त्यावेळी आरोपींनी कोयते उगारून परिसरात दहशत निर्माण केली. तसेच घटनास्थळावरून पळ काढला. यानंतर तक्रारदार तरुणाने थेट पोलिसांत धाव घेतली. याप्रकरणी दोघांविरोधात गुन्हा दाखल करण्यात आलाय. या संपूर्ण घटनेनंतर परिसरातील नागरिकांमध्ये घबराटीचं वातावरण पसरलंय.