Pune Water Cut : भरपावसाळ्यात पुणेकरांवर पाणीटंचाईचं संकट; येत्या गुरुवारी 'या' भागातील पाणीपुरवठा राहणार बंद

सागर आव्हाड, साम टीव्ही

पुणेकराचं टेन्शन वाढवणारी बातमी समोर आली आहे. कारण, भरपावसाळ्यात गुरुवारी (ता.२५) शहरातील काही भागातील पाणीपुरवठा बंद राहणार आहे. स्वारगेट मेट्रो स्थानकासमोर मोठ्या प्रमाणात पाणी गळती होत असल्याने महापालिका प्रशासनाकडून जलवाहिनी दुरुस्तीचे काम हाती घेतले जाणार आहे. त्यामुळे नागरिकांनी पाण्याचा साठा करून ठेवावा, असं आवाहन करण्यात आलंय.

पुणे महानगरपालिकेच्या पाणीपुरवठा विभागाने (Pune Water Supply News) दिलेल्या माहितीनुसार, स्वारगेट मेट्रो स्थानकाच्यासमोर मोठ्या प्रमाणात पाण्याची गळती सुरू आहे. ही ६०० मिलिमीटर व्यासाची जलवाहिनी पर्वती जलकेंद्रामधून एमएलआर टाकीवरून भवानी पेठेकडे जाते. त्यामुळे पाण्याची मोठी नासडी होत आहे.

पाणीगळती थांबवण्यासाठी येत्या गुरुवारी शहराच्या मध्यवर्ती भागातील काही पेठांसह पूर्व भागामध्ये पाणीपुरवठा बंद (Pune Water Cut News) राहणार आहे. तसेच दुसऱ्या दिवशीचा पाणीपुरवठा उशिराने तसेच कमी दाबाने होणार आहे. त्यामुळे नागरिकांना पाण्याचा काटकसरीने वापर करावा. तसेच पुरेसे पाणी भरून ठेवावे, असं आवाहन करण्यात आलंय.

कोणकोणत्या भागातील पाणीपुरवठा राहणार बंद?

मिळालेल्या माहितीनुसार, येत्या गुरुवारी शंकरशेठ रस्ता परिसर, गुरुवार पेठ, बुधवार पेठ, कासेवाडी, क्वार्टरगेट, महात्मा फुले पेठ, भवानी पेठ, नाना पेठ, लोहियानगर, सोमवार पेठ, अरुण कुमार वैद्य स्टेडीयम, घोरपडे पेठ या परिसरातील पाणीपुरवठा बंद राहिल.

त्याचबरोबर लक्ष्मीनारायण टॉकीजमागील काही भाग, सारसबाग परिसर, खडकमाळ आळी, शिवाजी रोड परिसर, मुकुंदनगर, महर्षीनगरचा काही भाग, टीएमव्ही कॉलनी, मीनाताई ठाकरे औद्योगिक वसाहत, अप्सरा टॉकीज परिसर, मीरा आनंद परिसर, श्रेयस सोसायटी परिसरातील पाणीपुरवठा देखील २४ तासांसाठी बंद ठेवण्यात येईल.