Pune Crime : कोंढवा अत्याचार प्रकरणात आणखी मोठा ट्विस्ट, तरुणीला 'या' महिलेनं केलं होतं मार्गदर्शन

पुणे : पुण्यामधील कोंढव्यातील लैंगिक अत्याचार प्रकरणातील तरुणाला पोलिसांनी अटक न करता नोटीस बजावली असल्याची माहिती समोर आली आहे. संपूर्ण प्रकरण गुंतागुंतीचं असल्यामुळे आणि या फ्रकरणात आरोप करण्यात आलेला तरुण हा तरूणीचा मित्र असल्याचे समोर आल्यानं त्याला अटक न करता फक्त नोटीस बजावली आहे. तपासात सहकार्य करणं आणि बोलावल्यानंतर पोलीस ठाण्यात हजर राहण्यासंदर्भात पोलिसांनी ही नोटीस बजावली आहे. त्याचदरम्यान, या घटनेत आणखी एक मोठा ट्विस्ट समोर आल्याचं सांगण्यात येत आहे.

रविवारी पोलीस आयुक्त अमितेश कुमार यांनी याबाबत मोठा धक्कादायक खुलासा केला आहे. ते सिंहगड पोलीस ठाण्याच्या अंतर्गत असणाऱ्या एका चौकीच्या उद्घाटनासाठी गेले होते. तेव्हा त्यांनी कोंढवा बलात्कार प्रकरणाचा उल्लेख करत नाराजी व्यक्त केली होती. तरुणीने असा आरोप केला की, तिच्यावर एका तरूणाने जबरदस्ती करत तिचं लैंगिक शोषण केलं. पण हे खरं नसून या घटनेमुळे पुणे शहरातील कायदा आणि सुव्यवस्था बिघडल्याचा चुकीचा संदेश पसरवण्यात आला, असं त्यांनी म्हटलं. तक्रार दाखल करण्यापूर्वी तरुणीने आपल्या शिक्षिकेकडून मार्गदर्शन घेतल्याचा संशय आता व्यक्त करण्यात येत आहे.

नेमकं प्रकरण काय?

संगणक अभियंता तरुणीवरील बलात्कार प्रकरणातील पीडितेनं सांगितलेला ‘कुरिअर बॉय’ हा प्रत्यक्षात तिचाच मित्र असल्याचं पोलीस तपासात उघड झालं आहे. ४ जुलै शुक्रवारी या आरोपीला ताब्यात घेण्यात आलं असून सध्या प्रकरणाचा तपास सुरू आहे. अशी माहिती पोलीस आयुक्त अमितेशकुमार यांनी दिली आहे. त्याचबरोबर तरूणीनं केलेले काही आरोप देखील खोटे असल्याचं समोर आलं आहे. घटनेच्या दिवशी कोणत्याही प्रकारच्या स्प्रेचा वापर झालेला नाही. त्याचबरोबर, तरुणीच्या मोबाइलमध्ये आढळलेला सेल्फी फोटो सहमतीने काढलेला असून, त्या खाली लिहिलेला मेसेजही तरुणीनेच एडीट करून लिहिल्याची कबूली दिली आहे. असंही पोलीस आयुक्तांनी सांगितलं आहे. या घटनेनं खळबळ उडाली होती. मात्र, पोलिसांच्या तपासामध्ये प्रकरण पुर्णपणे उलटं फिरल्यानं आता चर्चांना उधाण आलं आहे.