पुण्यात खळबळ, हॉटेलच्या खोलीत आढळला प्रसिद्ध व्यावसायिकाचा मृतदेह, हत्या की घातपात?

सचिन जाधव, पुणे प्रितिनिधी

पुण्यात हॉटेलात एका प्रसिद्ध उद्योजक अशोक जैन यांचा मृतदेह आढळल्याने खळबळ उडाली. याप्रकरणी पोलिसांनी गुन्हा दाखल केला असून तपास करण्यात येत आहे. अशोक जैन यांनी आत्महत्या केली की घातपात झाला? अशी चर्चा पुण्यात सुरू आहे. अशोक मिलापचंद जैन (वय ६१) हे पुण्यातील सॅलिसबरी पार्क परिसरातील उद्योजक आहेत. त्यांचा मृतदेह आपटे रस्त्यावरील एका हॉटेलमध्ये शनिवारी दुपारी आढळला.त्यांनी विषप्राशन करून आत्महत्या केल्याचा संशय पोलिसांनी व्यक्त केला आहे.

अशोक जैन शुक्रवारी घरातून बाहेर पडले होते, त्यानंतर त्यांचा कुटुंबीयांशी कोणताही संपर्क होऊ शकला नाही. त्यामुळे त्यांच्या कुटुंबीयांनी शुक्रवारी सायंकाळी स्वारगेट पोलीस ठाण्यात ते बेपत्ता असल्याची (मिसिंग) तक्रार नोंदवली होती. शनिवारी दुपारी आपटे रोडवरील एका हॉटेलमधील कर्मचाऱ्यांनी डेक्कन पोलिसांना माहिती दिली. त्यानंतर पोलिसांनी तात्काळ घटनास्थळी धाव घेतली. पोलिसांनी घटनास्थळी धाव घेऊन दरवाजा उघडला असता, जैन मृतावस्थेत आढळले.

पोलिसांना खोलीत ठिकठिकाणी उलट्या झाल्याचे दिसून आले. त्यावरून त्यांनी विषप्राशन केल्याचा प्राथमिक अंदाज वर्तवण्यात येत आहे. पोलिसांना घटनास्थळी एक चिठ्ठी (सुसाईड नोट) सापडली असून ती जैन यांनीच लिहिल्याचा संशय आहे. या पत्रातील मजकुराच्या आधारे पोलीस आत्महत्येमागचे नेमके कारण शोधत आहेत. सध्या डेक्कन पोलीस या प्रकरणाचा अधिक तपास करत आहेत.

उद्योजक अशोक जैन यांनी आत्महत्या केल्याचा संशय पोलिसांनी व्यक्त केला आहे. पोलिसांकडून या प्रकरणाचा कसून तपास केला जात आहे. अशोक जैन यांनी राजीनामा का दिला? त्यामागे काय कारणे आहेत? याचा तपास पोलिसांकडून केला जात आहे. पोलिसांनी जैन यांचा मृतदेह पोस्टमार्टमसाठी पाठवला आहे. जैन यांच्या कुटुंबियांकडे विचारपूस आणि चौकशी पोलिसांकडून केली जात आहे.