Pune : गे डेटिंग ॲपवर तरुणाला ओळख करणं पडलं महागात; भेटायला बोलावलं अन् भयंकर घडलं

पुणे शहरात ‘गे डेटिंग अँड चॅट’ ॲपच्या माध्यमातून तरुणांना जाळ्यात ओढून त्यांना मारहाण करत लुटणाऱ्या टोळीचा वारजे माळवाडी पोलिसांनी पर्दाफाश केला आहे. या प्रकरणात एका अल्पवयीन मुलासह दोघांना पोलिसांनी ताब्यात घेतले असून, या घटनेमुळे शहरात खळबळ उडाली आहे. ऑनलाइन डेटिंग ॲपचा गैरवापर करून तरुणांना लक्ष्य केले जात असल्याचे समोर आल्याने नागरिकांमध्ये चिंतेचे वातावरण निर्माण झाले आहे.

पोलिसांनी दिलेल्या माहितीनुसार, फिर्यादी तरुणाची आरोपींसोबत एका ‘गे डेटिंग अँड चॅट’ ॲपवर ओळख झाली होती. सुरुवातीला आरोपींनी तरुणाशी मैत्री केली आणि अनेक दिवस त्याच्याशी चॅटिंग केली. हळूहळू विश्वास संपादन करून त्यांनी संबंधित तरुणाला भेटण्यासाठी वारजे माळवाडी परिसरात बोलावले. प्रत्यक्ष भेट झाल्यानंतर आरोपींनी अचानक फिर्यादीला धमकावत बेदम मारहाण केली. त्यानंतर त्याचा मोबाईल फोन हिसकावून घेत जबरदस्तीने ऑनलाइन व्यवहार करून पैसे स्वतःच्या खात्यात हस्तांतरित करून घेतले. एवढ्यावरच न थांबता त्यांनी तरुणाच्या गळ्यातील चांदीची साखळीही हिसकावून घेतली आणि घटनास्थळावरून पसार झाले.

या घटनेनंतर घाबरलेल्या तरुणाने वारजे माळवाडी पोलिस ठाण्यात धाव घेत तक्रार दाखल केली. तक्रार मिळाल्यानंतर पोलिसांनी तातडीने तपासाची सूत्रे हलवली. आरोपींच्या मोबाईल लोकेशन, कॉल डिटेल्स आणि तांत्रिक विश्लेषणाच्या आधारे पोलिसांनी संशयितांचा माग काढण्यास सुरुवात केली.

अखेर पोलिसांनी सापळा रचून मुख्य आरोपीसह त्याच्या अल्पवयीन साथीदाराला ताब्यात घेतले. पोलिसांकडून आरोपींकडे आणखी अशा प्रकारच्या गुन्ह्यांची माहिती मिळते का, याचा तपास सुरू आहे. तसेच ऑनलाइन डेटिंग ॲप वापरताना अनोळखी व्यक्तींवर लगेच विश्वास ठेवू नये, कोणतीही संशयास्पद हालचाल दिसल्यास तातडीने पोलिसांशी संपर्क साधावा, असे आवाहन पोलिसांनी नागरिकांना केले आहे.