Pune Crime News : पिण्याचं पाणी मागितल्याने वाद; पुण्यात लोखंडी रॉडने वार करत तरुणाची हत्या

अक्षय बडवे, साम टीव्ही

पाणी पिण्यास मागितल्याने झालेल्या किरकोळ वादातून एका तरुणाची हत्या करण्यात आली. पुण्यातील मुंढवा परिसरातील कामगार मैदानाजवळ शनिवारी रात्रीच्या सुमारास ही घडली. श्रीकांत निवृत्ती आल्हाट असे हत्या झालेल्या तरुणाचे नाव आहे. याप्रकरणी पोलिसांनी एकाला अटक केली आहे.

राकेश तुकाराम गायकवाड असं अटक करण्यात आलेल्या व्यक्तींचं नाव असून याप्रकरणी संतोष आल्हाट यांनी फिर्याद दिली आहे. पोलिसांनी दिलेल्या माहितीनुसार, मृत श्रीकांत हा आरोपी राकेशचा नातेवाईक होता. ते शेजारीच राहत होते.

श्रीकांत हा एकटा राहून मोलमजुरी करून उदरनिर्वाह करायचा. शनिवारी (८ मे )रात्री तो दारू पिऊन घरी आला. यावेळी त्याने राकेश याच्याकडे पिण्यासाठी पाणी मागितले. नशेत धुंद असल्यामुळे राकेशने त्याला पाणी देण्यास नकार दिला. यावरून दोघांमध्ये बाचाबाची झाली.

वाद इतका विकोपाला गेला, राकेश याने श्रीकांतच्या डोक्यात वीट, तसेच सिमेंटचा गट्टू मारला. गंभीर दुखापत झाल्याने श्रीकांतचा जागीच मृत्यू झाला. दरम्यान, स्थानिकांकडून या घटनेची माहिती मिळताच पोलिसांनी घटनास्थळी धाव घेतली. श्रीकांतचा मृतदेह ताब्यात घेण्यात आला असून आरोपीला अटक करण्यात आली आहे.