Pune Crime: पुणे हादरले! सासऱ्याकडून सुनेची हत्या, ६ महिन्यांच्या बाळासमोर डोक्यात दगड घातला

Summary -

• पुण्यात कौटुंबिक वादातून हत्या

• सासऱ्याने सुनेची हत्या केली

• आरोपी सासरा झाला फरार

• नांदेड सिटी पोलिसांकडून तपास सुरू

पुण्यामध्ये सासऱ्याने सुनेची हत्या केल्याची धक्कादायक घटना घडली. कौटुंबिक वादातून ही घटना घडली. भिंतीवर डोकं आपटून आणि दगडाने मारहाण करत आरोपीने सुनेला जागीच संपवलं. त्यानंतर आरोपीने घराला कुलूप लावून पळ काढला. या घटनेमुळे पुणे हादरले. या प्रकरणा नांदेड सिटी पोलिस ठाण्यामध्ये आरोपीविरोधात गुन्हा दाखल करण्यात आला आहे. पोलिस सध्या आरोपीचा शोध घेत आहेत.

मिळालेल्या माहितीनुसार, ही घटना शनिवारी सकाळी धायरीतील रायकर मळा परिसरात घडली. स्वाती तेजस चौधरी (वय ३१ वर्षे) असे हत्या झालेल्या महिलेचे नाव आहे. भानुदास भास्कर चौधरी (वय ५७ वर्षे) असं आरोपीचे नाव आहे. स्वातीचा नवरा तेजस शिवाजीनगर कोर्टात क्लर्क म्हणून काम करतात. शनिवारी सकाळी तेजस चौधरी नेहमीप्रमाणे कामावर गेले. घरामध्ये स्वाती तिचे सहा महिन्यांचे बाळ आणि सासरा हे तिघे होते.

स्वाती आणि तिचा सासरा भानुदास यांच्यामध्ये नेहमी कौटुंबीक कारणांवरून वाद होत होते. शनिवारी देखील दोघांमध्ये याच कारणावरून वाद झाला. त्यानंतर स्वाती बाथरुममध्ये कपडे धुण्यासाठी निघून गेली. यावेळी आरोपी भानुदास चौधरी त्याठिकाणी गेला. त्याने स्वातीचे डोकं भिंतीवर आपटले त्यानंतर तिच्या डोक्यात दगड घातला. या हल्ल्यात गंभीर जखमी झालेल्या स्वातीचा जास्त रक्तस्राव होऊन जागीच मृत्यू झाला. सूनेची हत्या केल्यानंतर आरोपी घराला कुलूप लावून पळून गेला. तेजस यांच्या बहिणीने वहिणी स्वातीला फोन केला पण ती फोन उचलत नव्हती. त्यामुळे तिने तेजस यांना फोन करून सांगितले.

तेजस यांनी शेजारी राहणाऱ्या एका महिलेला फोन करून घरामध्ये काय झाले पाहण्यास सांगितले. त्यांनी घराचा दरवाजा उघडला तेव्हा घरातील परिस्थिती पाहून त्यांच्या पायाखालची जमीन सरकली. घरामध्ये स्वाती बाथरूमध्ये रक्ताच्या थारोळ्यात पडल्या होत्या. तर त्यांचे बाळ घरामध्येच होते. त्यांनी तात्काळ स्वातीचा नवरा तेजस आणि पोलिसांना फोन करून घटनेची माहिती दिली. पोलिसांनी घटनास्थळी धाव घेत स्वातीचा मृतदेह ताब्यात घेऊन शवविच्छेदनासााठी रुग्णालयात पाठवला. नांदेड सिटी पोलिसांनी आरोपीविरोधात गुन्हा दाखल केला असून त्याचा शोध घेत आहेत.