Pune Firing: जिम मालकावर अल्पवयीन तरुणांकडून गोळीबार; २ तासांत आरोपी ताब्यात, तपासात धक्कादायक कारण आलं समोर

पुण्यातील सहकारनगर भागात बुधवारी रात्री १० वाजण्याच्या सुमारास गोळीबाराची घटना घडली आहे. दोन दुचाकीवरून आलेल्या ४ जणांनी योगेश बनेकर नावाच्या व्यक्तीवर गोळीबार तीन राऊंड फायर केले. या घटनेत संबंधित तरुण जखमी झाला असून त्याच्यावर खाजगी रुग्णालयात उपचार सुरू आहेत. जुन्या वादातून या चौघांनी गोळीबार केल्याचं सांगितलं जात आहे.

पोलीस उपायुक्त मिलिंद मोहिते यांनी दिलेल्या माहितीनुसार, योगेश बनेकर हा नेहमीप्रमाणे आपल्या नियमित मार्गाने जात होता, त्यावेळी आरोपींनी त्याच्यावर हल्ला केला. दुचाकीवरून आलेल्या चार आरोपींनी आधी त्याची रेकी केल्याचा संशय आहे. आरोपींकडे पिस्तूलासह धारदार शस्त्रे देखील होती. त्यांनी बनेकर यांच्यावर अचानक गोळीबार केला. यात दोन गोळ्या योगेश बनेकर यांना लागल्या. स्थानिक नागरिकांनी तातडीने जखमी बनेकर याला जवळच्या खासगी रुग्णालयात दाखल केले. सध्या त्यांची प्रकृती स्थिर आहे.

घटनेची माहिती मिळताच सहकारनगर पोलिसांसह गुन्हे शाखेचे वरिष्ठ अधिकारी घटनास्थळी दाखल झाले. पोलिसांनी परिसराची नाकेबंदी करत सीसीटीव्ही फुटेज, प्रत्यक्षदर्शींची माहिती आणि तांत्रिक तपासाच्या आधारे आरोपींचा शोध घेतला. हा गुन्हा घडल्यानंतर अवघ्या एका तासाच्या आत पोलिसांनी कारवाई करत चार आरोपींना ताब्यात घेतले आहे. आरोपींची ओळख पटली असून त्यांची कसून चौकशी सुरू आहे.

पुण्यातील घटनांवर नीलम गोऱ्हे यांनी घेतली पोलीस महासंचालकांची भेट

राज्यातील बेकायदेशीर रेव्ह पार्ट्या, अमली पदार्थांची विक्री, गर्भलिंग निदान आणि पुण्यातील विषारी दारू प्रकरणातील संघटित गुन्हेगारी यासह विविध प्रकरणी शिवसेना नेत्या आणि आमदार डॉ नीलम गोऱ्हे यांनी पोलीस महासंचालक सदानंद दाते यांची मुंबईतील त्यांच्या कार्यालयात भेट घेतली.

या भेटीदरम्यान डॉ. गोऱ्हे यांनी पुणे, पिंपरी-चिंचवड परिसरातील बेकायदेशीर रेव्ह पार्ट्या व मुंबईतील अमली पदार्थ विक्री, विषारी दारू प्रकरणातील गुन्हेगारी साखळी उघड करण्यासह राज्यातील गर्भलिंग निदान प्रकरणांमध्ये होत असलेल्या तपास व कायदेशीर प्रक्रियेच्या विलंबाकडे लक्ष वेधले.