Pune : प्रेयसीचे लग्न दुसऱ्याशी ठरल्याने प्रियकराचा रक्तरंजित हल्ला; उपचारादरम्यान तरुणीचा मृत्यू, पुण्यातील धक्कादायक घटना

सागर आव्हाड, पुणे

पुण्यातील चंदननगर परिसरात धक्कादायक घटना समोर आली आहे. प्रियकराने प्रेयसीच्या गळ्यावर चाकूने सपासप वार केल्याने ती गंभीर जखमी झाली होती. दरम्यान या २२ वर्षीय तरुणीचा उपचारादरम्यान मृत्यू झाला आहे. प्रेमप्रकरणातून ही हत्या केल्याचे उघडकीस आले आहे. या घटनेमुळे परिसरात खळबळ उडाली असून पोलिसांनी आरोपी प्रियकराला अटक केली आहे. उजालादेवी दोहरे असे मृत तरुणीचे नाव आहे.

मिळालेल्या माहितीनुसार, आरोपी दिलीप राठोड आणि उजालादेवी दोहरे हे दोघेही पुण्यातील एका नामांकित मॉलमध्ये काम करत होते. कामाच्या ठिकाणी त्यांची ओळख झाली होती. काही दिवसांतच या ओळखीचे रूपांतर मैत्रीत झाले आणि पुढे दोघांमध्ये प्रेमसंबंध निर्माण झाले. मात्र काही दिवसांपूर्वी उजालादेवी तिच्या मूळ गावी गेली होती. त्यावेळी तिच्या कुटुंबीयांनी तिचे लग्न दुसऱ्या मुलाशी ठरवले.

तरुणीने ही माहिती दिलीप राठोड याला दिल्यानंतर तो संतापला होता. पोलिसांच्या माहितीनुसार, हे लग्न त्याला मान्य नव्हते. याच रागातून त्याने टोकाचे पाऊल उचलल्याचे समोर आले आहे. २९ एप्रिल रोजी रात्री सुमारे ८ वाजण्याच्या सुमारास आरोपी थेट तरुणीच्या चंदननगर येथील घरात घुसला. त्यानंतर दोघांमध्ये वाद झाला आणि संतापाच्या भरात दिलीपने तरुणीच्या गळ्यावर आणि शरीरावर चाकूने सपासप वार केले.

या हल्ल्यात उजालादेवी गंभीर जखमी झाली होती. कुटुंबीयांनी तिला तातडीने रुग्णालयात दाखल केले. गेल्या काही दिवसांपासून तिच्यावर उपचार सुरू होते. मात्र उपचारादरम्यान तिचा मृत्यू झाला. तरुणीच्या मृत्यूनंतर कुटुंबीयांवर दुःखाचा डोंगर कोसळला आहे. या प्रकरणी चंदननगर पोलिस ठाण्यात तरुणीच्या नातेवाईकांनी फिर्याद दिली होती. त्यानंतर पोलिसांनी आरोपी दिलीप राठोड याच्याविरोधात गुन्हा दाखल करून त्याला ताब्यात घेतले. न्यायालयाने आरोपीला ७ मेपर्यंत पोलीस कोठडी सुनावली असून पुढील तपास चंदननगर पोलीस करत आहेत.