Pune Airport Blast Threat: ७५ वर्षांच्या आजीने दिली पुणे विमानतळ बॉम्बने उडवून देण्याची धमकी; प्रवाशांचा एकच गोंधळ अन् अधिकाऱ्यांची धावपळ

अक्षय बडवे, प्रतिनिधी...

Pune Crime News: ७२ वर्षीय महिलेने पुणे विमानतळ बॉम्बने उडवून देण्याची धमकी दिल्याचा खळबळजनक प्रकार समोर आला आहे. विमानतळावर सेक्युरिटी चेकिंग दरम्यान वेळ लागत असल्याने महिलेने ही धमकी दिली. या प्रकाराने विमानतळावरील अधिकारी आणि सुरक्षा रक्षकांची चांगलीच धावपळ झाली.

याबाबत अधिक माहिती अशी की, आज सकाळी ८.३० वाजता पुणे विमानतळावर ही खळबळजनक घटना घडली. निता प्रकाश कपलानी (वय ७२) असे धमकी देणाऱ्या महिलेचे नाव असून ती पुणे ते दिल्ली या विमानाने प्रवास करणार होती.

यावेळी फिस्किंग बूथमध्ये सुरक्षा तपासणीसाठी पोलिस अधिकारी जेव्हा त्यांचा तपास करत होत्या तेव्हा त्यांनी "एवढं काय तपासत आहेत? माझ्याकडे बॉम्ब आहे आणि तो ४ ही बाजूने असल्याचे सांगितले. महिलेने असे सांगताच विमानतळावर एकच गोंधळ उडाला. या प्रकाराने विमानतळावरील पोलीस अधिकारी आणि सुरक्षारक्षकांची मोठी धावपळ उडाली.

मात्र ही धमकी म्हणजे खोडसाळपणा असल्याचे लक्षात येताच पोलीसांचा जीव भांड्यात पडला. या प्रकरणात निता प्रकाश कपलानी या महिलेवर गुन्हा दाखल करण्यात आला असून त्यांना नोटीसही देण्यात आली आहे. आजीबाईंच्या खोडसाळपणाची सध्या चांगलीच चर्चा होत आहे. (Latest Marathi News)