Pune News: पाणी आणायला विहिरीवर गेली, पाय घसरला अन् अनर्थ घडला; १५ वर्षीय मुलीचा बुडून मृत्यू

पुणे, ता. २४ जून २०२४

पाणी आणण्यासाठी गेलेल्या १५ वर्षीय मुलीचा विहिरीत बुडून मृत्यू झाल्याची दुर्दैवी घटना इंदापूर तालुक्यात घडली. सारिका शिंदे असे या मृत मुलीचे नाव असून इंदापूर तालुक्यातील राजवडी पाटीवर घडलेल्या या घटनेने सर्वत्र हळहळ व्यक्त होत आहे.

याबाबात सविस्तर माहिती अशी की, इंदापूर तालुक्यातील राजवडी पाटी येथे पंधरा वर्षीय मुलीचा विहिरीत पाय घसरुन पडल्याने दुर्दैवी मृत्यू झाला. सारिका पिराजी शिंदे असे या मुलीचे नाव असून पाणी आणायला विहिरीवर गेली असता ही दुर्दैवी घटना घडली.

याबाबतची माहिती मिळताच पोलिसांनी घटनास्थळी धाव घेतली असून तिचा शोध सुरू आहे. सारिका शिंदे ही जालना जिल्ह्यातील परतुर तालुक्यातील राहणारी आहे. आज सकाळी साडेसात वाजता राजवडी तालुक्यातील इंदापूर येथील एका विहिरीवर ती पाणी भरण्यासाठी गेली होती.

याचवेळी ती पाय घसरून पाण्यात बुडाल्याचा अंदाज व्यक्त केला जात आहे. इंदापूर पोलीस आणि महसूल प्रशासनच्या नेतृत्वाखाली स्थानिक नागरिकांच्या सहाय्याने तिचा शोध सुरू आहे. दरम्यान, या घटनेने मुलीच्या कुटुंबियांर दुःखाचा डोंगर कोसळला असून सर्वत्र हळहळ व्यक्त होत आहे.