Pune Accident : सिंहगडावर जाताना घाटात टेम्पोचा अपघात, ५ जणांसह १५० फूट दरीत कोसळला

Pune Sinhagad ghat accident : पुण्यातील सिंहगड किल्ल्यावर जाणाऱ्या रस्त्यावर भीषण अपघाताची घटना घडली. ५ जण टेम्पोमधून साहित्य घेऊन जात होते. पण त्यावेळी अवघड वळणावर टेम्पोचा अपघात झाला. सुदैवाने या दुर्दैवी घटनेत जीवितहानी झालेली नाही. ३ जण जखमी झाले आहेत, तर २ जण सुखरूप आहेत. टेम्पो दरीत कोसळताना वेळीच सर्वांनी उड्या मारल्या. त्यामुळे मोठा अनर्थ टळला. अपघातानंतर टेम्पोचा चुराडा झाल्याचे फोटो समोर आले आहेत.

सिंहगड किल्ल्याकडे जाणाऱ्या रस्त्यावर अपघात

पुण्यातील सिंहगड किल्ल्याकडे जाणाऱ्या घाट रस्त्यावर अपघात झाला. मालवाहू टेम्पो १०० ते १५० फूट खोल दरीत कोसळल्यामुळे परिसरात एकच खळबळ उडाली होती. सिंहगड किल्ल्याच्या घाट रस्त्यावरून कोंढणपूर मार्गे सिंहगड -डोणजेकडे टेम्पो येत होता. त्याचवेळी घाटातील एका अवघड वळणावर चालकाचं संतुलन सुटले. त्यामुळे टेम्पो खोल दरीत कोसळला. संध्याकाळच्या सुमारास ही घटना घडलीय.

दैव बलवत्तर म्हणून...

मिळालेल्या माहितीनुसार या अपघातात कुठलीही जीवितहानी झालेली नाही. टेम्पोमध्ये एकूण ५ जण प्रवास करत होते. यातील ३ जणांना किरकोळ दुखापत झाली असून २ जण सुखरूप आहेत. सर्वांनी वेळीच उडी मारून टेम्पोतून बाहेर पडले, त्यामुळे सर्वजण सुखरूप आहेत. पाचही जणांचे दैव बलवत्तर म्हणून वाचल्याच्या प्रतिक्रिया परिसरातून येत आहेत.

नेमकं झालं काय?

पोलिसांनी दिलेल्या माहितीनुसार, या टेम्पोतून लाकडाची वाहतूक केली जात होती. चालकाचा वाहनावरचा ताबा सुटल्याने रस्त्याच्या कडेची लोखंडी सुरक्षा जाळी तोडून हे वाहन खोल दरीत कोसळले. दरम्यान, या घटनेची माहिती मिळताच सिंहगड वनविभागाचे परिमंडळ अधिकारी समाधान पाटील यांनी वनविभागाच्या कर्मचाऱ्यांसह घटनास्थळी धाव घेत जखमींना खोल दरीतून वर काढत रुग्णवाहिकेतून जवळच्या खासगी रुग्णालयात उपचारासाठी पाठवले.