Pune Accident Update: २५ वाहनांना उडवून कंटेनरवाला सुस्साट सुटला; रस्त्यावर सिनेस्टाइल पाठलागाचा थरार, लोकांनी केबिनबाहेर ओढून कुटला! VIDEO

पुण्यातील चाकणमध्ये भीषण रस्ते अपघाताची घटना घडली. भरधाव कंटेनरने २५ वाहनांना धडक दिली. चाकण-शिक्रापूर रस्त्यावर हा भीषण अपघात झाला. वाहनांना धडक दिल्यानंतर कंटेनर घेऊन चालक पळून गेला. पण पोलिसांनी आणि स्थानिक तरूणांनी बाईकवरून त्याचा पाठलाग करत कंटेनर चालकाला पकडून चोप दिला आणि अटक केली. चालकाच्या अटकेचा थरारक व्हिडीओ समोर आला आहे.

भीषण अपघात ते कंटेनरचा थरारक पाठलाग आणि नंतर चोप (व्हिडिओ बघा)

मिळालेल्या माहितीनुसार, आज चाकण - शिक्रापूर रस्त्यावर एका भरधाव कंटेनरने २० ते २५ वाहनांना जोरदार धडक दिली. जवळपास १५ ते २० किलोमीटरपर्यंत हा कंटेनर समोर येईल त्या वाहनांना धडक देत होता. या अपघातानंतर कंटेनर चालक तिथे थांबण्याऐवजी त्याने पळ काढला. या अपघातानंतर पोलिसांनी आणि संतप्त झालेल्या स्थानिक तरुणांनी कंटेनरचा पाठलाग केला. यावेळी कंटेनर चालकाने पोलिसांच्या वाहनाला सुद्धा धडक दिली.

अखेर संतप्त नागरिकांनी त्या कंटेनरचा दुचाकीवरून पाठलाग केला. व्हिडीओमध्ये पाहिलं चाकणमधील वाजेवडी येथे जवळपास २० ते ३० दुचाकीस्वार यांनी कंटेनरवर दगडफेक करत तो थांबवला आणि चालकाला चोप दिला. यावेळी त्यांनी कंटेनरच्या टायरची हवा देखील सोडली. कंटेनर चालक अकिब खान याला पोलिसांनी अटक केली आहे.

हा कंटेनर शिक्रापूर दिशेने जात होता त्यावेळी त्याने २५ वाहनांना जोरदार धडक दिली. या अपघातामध्ये अनेक वाहनांचा चक्काचूर झाला. या अपघातामध्ये ४ जण जखमी झाले आहेत. जखमींमध्ये एका लहान मुलीचा देखील समावेश आहे. या सर्वांना नजीकच्या रुग्णालयामध्ये उपचार सुरू आहेत. पोलिसांकडून या अपघाताचा तपास सुरू आहे.