Maharashtra Politics : पालघरच्या राजकारणात मोठी उलथापालथ; बड्या नेत्याने केला बविआमध्ये प्रवेश

Palghar Jayesh Patil Joins Hitendra Thakur Party पालघरच्या राजकारणात खळबळ उडाली आहे. भाजपाला पाठिंबा देणाऱ्या आगरी सेनेचे पालघर जिल्हा प्रवक्ते जयेश पाटील यांनी आपल्या पदाचा राजीनामा दिला असून अधिकृतपणे हितेंद्र ठाकूर यांच्या बहुजन विकास आघाडीमध्ये प्रवेश केला. त्यांच्यासोबत शेकडो पदाधिकारी आणि कार्यकर्त्यांनीदेखील आगरी सेनेला रामराम करत बविआमध्ये प्रवेश केला.

जयेश पाटील यांनी काल हितेंद्र ठाकूर यांच्या उपस्थितीत बहुजन विकास आघाडीमध्ये प्रवेश केला. त्यांचा पक्षप्रवेश सोहळा विरार येथील विवा कॉलेजमध्ये पार पडला. यावेळी माजी आमदार हितेंद्र ठाकूर यांनी जयेश पाटील आणि त्यांच्या समर्थकांचे स्वागत केले. जयेश पाटील यांनी काही दिवसांपूर्वीच आगरी सेनेच्या प्रवक्ता पदाचा राजीनामा दिला होता. तेव्हापासूनच ते कोणत्या पक्षात जाणार याकडे सर्वांचे लक्ष लागले होते.

अखेर त्यांनी 'बविआ'चा पर्याय निवडत नव्या राजकीय प्रवासाला सुरुवात केली आहे. आगरी समाजात जयेश पाटील यांचे दांडगे जनसंपर्क आणि नेटवर्क मजबूत आहे. आगामी लोकसभा आणि विधानसभा निवडणुकीच्या पार्श्वभूमीवर भाजपसोबत असलेल्या आगरी सेनेतील ही फूट भाजपसाठी मोठा धक्का मानला जात आहे.