ठाणे ते नवी मुंबई एअरपोर्ट प्रवास सुसाट, ३ उड्डाणपूल तयार होणार; वाहतूक कोंडीचा प्रश्न सुटणार

नवी मुंबई आतंरराष्ट्रीय विमानतळ पूर्ण क्षमतेनं कार्यरत झाल्यानंतर मुंबई महानगर प्रदेशातून शहराकडे येणाऱ्या वाहतुकीत मोठी वाढ होण्याची शक्यता आहे. याच पार्श्वभूमीवर नवी मुंबई महानगरपालिका ठाणे - बेलापूर रोडवरील वाहतूक सुरळीत ठेवण्यासाठी मोठ्या प्रमाणावर पायाभूत सुविधा उभारण्याच्या तयारीत आहे. दरम्यान, यासाठी मुख्य रस्त्यावर ३ उड्डाणपूल उभारण्याचा प्रस्ताव महापालिकेनं सादर केला आहे.

नवी मुंबई आतंरराष्ट्रीय विमानतळावरून २५ डिसेंबरपासून उड्डाणे सुरू होणार आहेत. सुरूवातीच्या टप्प्यात इंडिगो ही विमान कंपनी दिल्ली, बंगळूरू, हैदराबाद, अहमदाबाद, लखनऊ, जयपूर, नागपूर, उत्तर गोवा, कोचीन आणि मंगळुरू या दहा ठिकाणी देशांतर्गत उड्डाणे होतील. नंतर उड्डाणे वाढण्याची शक्यता आहे.

मिळालेल्या माहितीनुसार, एअर इंडियाने देखील नवी मुंबई आतंरराष्ट्रीय विमानतळावरून २५ डिसेंबरपासून सेवा सुरू करणार असल्याची माहिती दिली आहे. सुरूवातीला बंगळुरूसाठी नियमित एक आणि दिल्लीसाठी ५ उड्डाणे सुरू होतील अशी माहिती समोर आली आहे. १ जानेवारीपासून दोन्ही मार्गांवर दिवसातून उड्डाणे सुरू होतील. या सर्व सेवांसाठी ऑनलाइन तसेच ऑफलाइन बुकिंगला सुरूवात झाली आहे.

रस्ते वाहतूकीवर होणारा अपेक्षित परिणाम लक्षात घेता, एनएमएमसीने ३ प्रमुख ठिकाणी उड्डाणपूल बांधण्याची योजना आखली आहे.

रबाळे जंक्शन उड्डाणपूल - १७१ कोटी रुपये

क्रिस्टल हाऊस–पावणे दरम्यान उड्डाणपूल - ११० कोटी रुपये

BASF परिसर ते महापे येथील हुंडई शोरूमपर्यंतचा मोठा उड्डाणपूल - ३३८ कोटी रुपये

तसेच ठाणे - बेलापूर मार्गाच्या संपूर्ण पुनर्बांधणीसाठी अतिरिक्त २२७ कोटी रूपये राखीव ठेवण्यात आले आहेत.

दरम्यान, नवी मुंबईतील तुर्भे येथे एक वेगळा उड्डाणपूल आधीच बांधण्यात येत आहे. हा परिसर रेल्वे स्थानकाजवळील सततच्या वाहतूक कोडींने त्रस्त आहे. या प्रकल्पाचा उद्देश दीर्घकालीन वाहतूक कोंडी दूर करणे आणि प्रवाशांची हालचाल सुलभ करणे आहे.

एनएसएमसीच्या शहर अभियांत्रिकी विभागातील एका अधिकाऱ्यानं दिलेल्या माहितीनुसार, नवी मुंबई आतंरराष्ट्रीय विमानतळ पूर्ण क्षमतेनं सुरू झाल्यानंतर प्रवासी तसेच मालवाहतूक मोठ्या प्रमाणात वाढणार आहे. या वाढत्या वाहतुकीसाठी ठाणे बेलापूर रस्त्याचा पुनर्विकास अत्यंत आवश्यक आहे. महामंडळकाडून या प्रकल्पाचे नियोजन वेगाने सुरू आहे. येत्या काही वर्षांत ठाणे - बेलापूर रस्ता अधिक सुरक्षित, मजबूत तसेच सुसज्ज होणार आहे.