घाटकोपरमध्ये (Ghatkopar) पेट्रोलपंपावर मोठं होर्डिंग कोसळ्याची घटना घडली आहे. वादळी वाऱ्यासह कोसळणाऱ्या मुसळधार पावसामुळे हे होर्डिंग कोसळले. होर्डिंगखाली ८० वाहनं अडकल्याची शक्यता आहे. तसंच, १५० ते २०० जण अडकल्याची भीती व्यक्त केली जात आहे. या घटनेमध्ये ७ जण जखमी झाले आहेत. जखमींचा आकडा आणखी वाढण्याची शक्यता व्यक्त केली जात आहे. घटनेची माहिती मिळताच अग्निशमन दलाचे जवान आणि पोलिसांनी घटनास्थळी धाव घेतली आहे. सध्या घटनास्थळी युद्धपातळीवर मदतकार्य सुरू आहे.
मिळालेल्या माहितीनुसार, घाटकोपरच्या इस्टर्न एक्स्प्रेस हायवेजवळील पेट्रोल पंपावर अचानक होर्डिंग कोसळले. घाटकोपर पूर्वच्या पंतनगरमधील पोलिस ग्राऊंडजवळ हा पेट्रोल पंप आहे. सायंकाळी साडेचारच्या सुमारास या पेट्रोल पंपावर होर्डिंग कोसळले. जोरदार वाऱ्यासह पडणाऱ्या मुसळधार पावसामुळे हे होर्डिंग कोसळले. मुसळधार पडणाऱ्या पावसामुळे अनेक जण आपल्या वाहनांसह या पेट्रोल पंपात थांबले होते. तेवढ्यात ही मोठी दुर्घटना घडली.
होर्डिंग कोसळल्यामुळे पेट्रोल पंपाचे मोठे नुकसान झाले आहे. होर्डिंगसह पेट्रोल पंपाचे छत वाहनांवर कोसळले. या खाली १५० ते २०० जण अडकल्याची शक्यता व्यक्त केली जात आहे. या घटनेमध्ये ७ जण जखमी झाले असून त्यांना नजीकच्या रुग्णालयात उपचारासाठी हलवण्यात आले आहे. जखमींचा आकडा आणखी वाढण्याची शक्यता आहे. या घटनेत होर्डिंगखाली अनेक वाहनं दबल्यामुळे त्यांचे मोठे नुकसान झाले आहे.
घटनेची माहिती मिळताच अग्निशमन दलाचे जवान आणि पोलिसांनी घटनास्थळी धाव घेतली आहे. घटनास्थळी मदतकार्य युद्धपातळीवर सुरू आहे. सध्या घटनास्थळी नागरिकांनी मोठी गर्दी केली आहे. या घटनेमुळे घटनास्थळी एकच गोंधळ उडाला. दरम्यान, वडाळ्यामध्ये देखील वादळी वाऱ्यामुळे पार्किंग लिफ्ट कोसळली. या पार्किंग लिफ्टखाली अनेक वाहनं अडकली असून त्यांचे नुकसान झाले आहे. याठिकाणी देखील मदतकार्य सुरू आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.