Mumbai-Pune Expressway : मुंबई-पुणे एक्सप्रेसवेवर पहाटे थरार! मिसिंग लिंकवर २ भीषण अपघात; रस्त्यावर लागला केळींचा ढीग

दिलीप कांबळे, मावळ प्रतिनिधी

Mumbai-Pune Expressway Accident : मुंबई-पुणे द्रुतगती महामार्गावरील मिसिंग लिंक (कनेक्टिंग लिंक) वर आज पहाटेपासून अपघातांची मालिका पाहायला मिळाली. अवघ्या काही तासांच्या अंतराने झालेल्या दोन वेगवेगळ्या अपघातांमुळे महामार्गावरील वाहतूक विस्कळीत झाली असून ६ ते ७ जण जखमी झाले आहेत.

पहिली घटना मध्यरात्री सुमारे ३ वाजेच्या सुमारास घडली. मुंबईच्या दिशेने जाणाऱ्या कनेक्टिंग लिंकवर अतिवेगामुळे चालकाचा ताबा सुटल्याने केळी वाहतूक करणारा एक पिकअप टेम्पो पलटी झाला. या अपघातात चालक समीर शेख हा जखमी झाला असून त्याच्यावर खोपोली नगरपालिका रुग्णालयात उपचार सुरू आहेत. टेम्पो पलटी झाल्याने त्यातील केळी रस्त्यावर विखुरली जाऊन केळींचा मोठा ढीग साचला होता. महामार्ग पोलिसांकडून अपघातग्रस्त टेम्पो बाजूला करून रस्ता साफ करण्याचे काम युद्धपातळीवर करण्यात आले.

यानंतर पहाटे ५ वाजण्याच्या सुमारास लोणावळा हद्दीत दुसरा अपघात घडला. मुंबईच्या दिशेने जाणाऱ्या मार्गावर बस आणि ट्रकमध्ये जोरदार धडक झाली. या अपघातात बसमधील ६ ते ७ प्रवासी जखमी झाले आहेत. जखमींपैकी दोन प्रवाशांवर खोपोली नगरपालिका रुग्णालयात, एकावर खोपोली-शीळ फाटा येथील सिद्धिविनायक हॉस्पिटलमध्ये, तर उर्वरित जखमींना पनवेलच्या महात्मा गांधी रुग्णालयात उपचारासाठी दाखल करण्यात आले आहे.

अपघाताची माहिती मिळताच बोरघाट दस्तुरी महामार्ग पोलिसांनी घटनास्थळी धाव घेऊन मदतकार्य सुरू केले आणि वाहतूक सुरळीत केली. या सलग अपघातांमुळे द्रुतगती महामार्गावरील प्रवाशांच्या सुरक्षेचा प्रश्न पुन्हा एकदा ऐरणीवर आला आहे.