Mumbai Pune Expressway : मुंबई-पुणे एक्सप्रेस वेवर भीषण अपघात, बोगद्यामध्ये ७-८ वाहनांची एकमेकांना जोरदार धडक

• मुंबई-पुणे एक्सप्रेस वेवर वाहनांचा विचित्र अपघात

• ७ ते ८ वाहने एकमेकांना बोगद्यात धडकल्याची प्राथमिक माहिती

• खोपोलीजवळ बोरघाटात येथील बोगद्यात झाला अपघात

सचिन कदम, साम टीव्ही, प्रतिनिधी

Mumbai Pune Expressway News : मुंबई-पुणे एक्सप्रेस वेवर वाहनांचा भीषण अपघात झाल्याची माहिती समोर आली आहे. विचित्र पद्धतीने वाहने एकमेकांना धडकली आहेत. बोगद्यामध्ये तब्बल ७ ते ८ वाहनांची टक्कर झाल्याचे म्हटले जात आहे. खोपोलीजवळच्या बोरघाटातील बोगद्यामध्ये हा अपघात झाला आहे.

मिळालेल्या माहितीनुसार, मुंबई-पुणे द्रुतगती महामार्गावर मोठा अपघात झाला आहे. खोपोलीजवळच्या बोरघाट येथील एका बोगद्यात सुमारे ७ ते ८ वाहने एकमेकांना धडकल्याची प्राथमिक माहिती समोर आली आहे. अपघातात ट्रक आणि कारचा समावेश असल्याचे म्हटले जात आहे. अपघातग्रस्त वाहनांचे मोठे नुकसान झाले आहे.

मुंबई पुणे महामार्ग पोलीस, रुग्णवाहिका, देवदूत यंत्रणा, हेल्प फाउंडेशनचे सदस्य घटनास्थळी दाखल झाले आहेत. अपघातामध्ये जखमी झालेल्यांना खोपोली नगर पालिका आणि खासगी रुग्णालयात उपचारांसाठी हलवण्यात आले आहे. अपघातामुळे वाहतूक कोंडी झाली होती. अपघातग्रस्त वाहने बाजूला करुन वाहतूक सुरळीत करण्याचे काम सुरु आहे.

वर्धा हिंगणघाट मार्गावर बस-ट्रेलरचा अपघात

वर्धा हिंगणघाट मार्गावरील धोत्रा चौरस्ता येथे बस आणि ट्रेलरची धडक झाल्याची माहिती समोर आली आहे. या धडकेमध्ये बसचालकासह दहा ते बारा प्रवासी जखमी झाले आहेत. यातील बसचा चालक गंभीर जखमी असल्याचे म्हटले जात आहे. जखमींना तातडीने वर्धाच्या सेवाग्राम रुग्णालयात उपचारांसाठी दाखल करण्यात आले आहे.