Mumbai Rain Alert : वातावरण बदललं! मुंबईत पुढील काही तासांत धो धो पाऊस कोसळणार, IMD कडून अलर्ट

राज्यात एकीकडे उन्हाचा कडाका असून विदर्भाला रेड अलर्ट देण्यात आला होता. तसेच काल पासून मुंबईतील तापमान ३५ अंश सेल्सिअस इतके होते. अशातच पूर्व मौसमी पावसाने मुंबईतील मुलुंड, घाटकोपर परिसरात हजेरी लावली आहे. काही काळ बरसलेल्या सरींमुळे नागरिकांना दिलासा मिळाला आहे. पुढील ३६ ते ४८ तासांत अनेक भागांमध्ये पावसाचा जोर वाढण्याचा अंदाज वर्तवण्यात आला आहे. दरम्यान इतर जिल्ह्यांमध्ये तापमानाचा पारा वाढलेला पाहायला मिळणार असून मध्य महाराष्ट्रात पावसासाठी पोषक हवामान तयार होण्याची शक्यता वर्तवण्यात आली आहे.

हवामान खात्याने दिलेल्या अंदाजानुसार, मध्य महाराष्ट्रात पावसासाठी पोषक हवामान तयार होत आहे. त्यामुळे येत्या काही दिवसांत या भागातही पावसाच्या सरी कोसळण्याची शक्यता आहे. भारतीय हवामान विभागाने मान्सूनच्या आगमनाबाबतही संकेत दिले आहेत. नैऋत्य मान्सून सुमारे २६ मेच्या सुमारास केरळमध्ये दाखल होण्याची शक्यता असून, त्यानंतर तो टप्प्याटप्प्याने पुढे सरकत जूनच्या सुरुवातीला महाराष्ट्रात पोहोचू शकतो.

विदर्भात उष्णतेची लाट कायम असून, पुढील तीन दिवस काही जिल्ह्यांना ‘रेड अलर्ट’ देण्यात आला आहे. अतितीव्र उष्णतेमुळे नागरिकांनी आवश्यक ती काळजी घेण्याचे आवाहन प्रशासनाने केले आहे. इतर जिल्ह्यांमध्येही तापमानाचा पारा वाढलेला दिसून येत आहे.

एकूणच, राज्यात सध्या दोन वेगवेगळे हवामानाचे चित्र पाहायला मिळत आहे. विदर्भात उष्णतेची तीव्रता कायम असताना, मुंबईसह काही भागात पावसाने हजेरी लावल्याने दिलासा निर्माण झाला आहे. आगामी काही दिवसांत हवामानात आणखी बदल होण्याची शक्यता हवामान विभागाने वर्तवली आहे.