Mumbai Crime : संसाराचा भयंकर शेवट, मध्यरात्री १ वाजता बेडरूममध्ये नवऱ्याने केलं भयंकर कृत्य, पत्नीचा मृत्यू होताच...

संजय गडदे, मुंबई प्रतिनिधी

Mumbai Malad Crime: मालाड (पूर्व) येथील कुरार गाव परिसरात कौटुंबिक वादातून पतीने पत्नीच्या छातीवर चाकूने वार करून तिची निर्घृण हत्या केल्याची धक्कादायक घटना रविवारी पहाटे घडली. सुचिता आकाश साळुंखे (वय २९) असे मृत महिलेचे नाव असून, त्या एका पॅथॉलॉजी लॅबमध्ये (प्रयोगशाळा) नोकरी करत होत्या. घटनेनंतर पत्नीला रुग्णालयात दाखल करून आरोपी पती आकाश साळुंखे तिथून फरार झाला असून, कुरार पोलीस सध्या त्याचा कसून शोध घेत आहेत.

पोलिसांनी दिलेल्या माहितीनुसार, सुचिता आणि आकाश हे कुरार गावातील तानाजी नगर येथील शिवसागर सोसायटीत राहत होते. त्यांचा प्रेमविवाह झाला असून त्यांना चार वर्षांचे एक बाळ आहे. आरोपी आकाश हा बेरोजगार असून तो मद्य आणि अमली पदार्थांच्या व्यसनाधीन होता.

सुचिता आणि आकाश यांच्यात कौटुंबिक कारणांवरून वारंवार वाद होत असल्याचे तपासात समोर आले आहे. तसेच आकाश सुचिता यांच्या चारित्र्यावर संशय घेत असे. रविवारी पहाटेच्या सुमारास दोघांमध्ये पुन्हा जोरदार भांडण झाले. हा वाद विकोपाला गेल्यावर संतापलेल्या आकाशने स्वयंपाकघरातील चाकूने सुचिता यांच्या छातीवर वार केले. या प्राणघातक हल्ल्यात सुचिता गंभीर जखमी झाल्या.

घटनेनंतर सुचिता यांची प्रकृती चिंताजनक असल्याचे पाहून आकाशने मित्रांच्या मदतीने त्यांना कांदिवली (पश्चिम) येथील डॉ. बाबासाहेब आंबेडकर (शताब्दी) रुग्णालयात नेले. मात्र, डॉक्टरांनी तपासणीअंती सुचिता यांना दाखल करण्यापूर्वीच मृत घोषित केले.

पत्नीचा मृत्यू झाल्याचे स्पष्ट होताच आरोपी आकाशने रुग्णालयातून काढता पाय घेतला व तो पसार झाला. घटनेची माहिती मिळताच कुरार पोलिसांनी घटनास्थळी व रुग्णालयात धाव घेऊन चौकशी सुरू केली आहे. आरोपीचा शोध घेण्यासाठी पोलिसांची विविध पथके रवाना करण्यात आली आहेत.

या प्रकरणी कुरार पोलिसांनी 'भारतीय न्याय संहिता' (BNS) मधील संबंधित कलमांनुसार हत्येचा गुन्हा दाखल केला आहे. हत्येचे नेमके कारण, दोघांमधील वादाची पार्श्वभूमी आणि घटनेच्या वेळी नेमके काय घडले, याचा अधिक तपास पोलीस करत आहेत.