प्रवाशांचे होणार मेगाहाल! रविवारी असणार मेगाब्लॉक
माटुंगा ते मुलुंड दरम्यान अप आणि डाउन जलद मार्गावर मेगाब्लॉक
मेगाब्लॉकदरम्यान जलद लोकल धीम्या मार्गावरून चालवण्यात येणार
प्रवाशांनो जर तुम्ही रविवारी कामानिमित्त घराबाहेर पडत असाल तर ही बातमी तुमच्यासाठी. रेल्वे रुळांची देखभाल, दुरुस्ती आणि सिग्नल यंत्रणेतील आवश्यक कामे पूर्ण करण्यासाठी मध्य रेल्वे आणि पश्चिम रेल्वेकडून मेगाब्लॉक घेण्यात येणार आहे. रविवारी मध्य रेल्वेच्या मुख्य मार्गासह हार्बर मार्गावरील लोकल सेवांवर या ब्लॉकचा परिणाम होणार आहे. त्यामुळे प्रवाशांना प्रवासादरम्यान काही अडचणींचा सामना करावा लागू शकतो. रेल्वे प्रशासनाने प्रवाशांना वेळापत्रकाची माहिती घेऊनच प्रवासाचे नियोजन करण्याचे आवाहन केले आहे.
मध्य रेल्वेच्या माटुंगा ते मुलुंड स्थानकांदरम्यान अप आणि डाउन जलद मार्गावर रविवारी सकाळी ११.०५ ते दुपारी ३.४५ या वेळेत मेगाब्लॉक घेण्यात येणार आहे. या कालावधीत जलद मार्गावरील लोकल गाड्या धीम्या मार्गावरून चालवण्यात येतील. परिणामी, संबंधित लोकल गाड्यांच्या प्रवासाच्या वेळेत बदल होण्याची शक्यता आहे. गंतव्यस्थानी पोहोचण्यासाठी प्रवाशांना नेहमीपेक्षा सुमारे १५ मिनिटे अधिक लागू शकतात.
हार्बर मार्गावर कुर्ला ते वाशी दरम्यान अप आणि डाउन मार्गावर सकाळी ११.१० ते दुपारी ४.१० या वेळेत ब्लॉक घेण्यात येणार आहे. यामुळे छत्रपती शिवाजी महाराज टर्मिनस (सीएसएमटी) येथून पनवेल, बेलापूर आणि वाशीच्या दिशेने धावणाऱ्या अनेक लोकल फेऱ्या रद्द करण्यात येणार आहेत. प्रवाशांची गैरसोय कमी करण्यासाठी सीएसएमटी ते कुर्ला तसेच पनवेल ते वाशी या मार्गांवर विशेष लोकल चालवण्यात येतील. याशिवाय, ठाणे ते वाशी आणि ठाणे ते नेरूळदरम्यान हार्बर मार्गावरील प्रवाशांना प्रवास करता येणार आहे. त्यामुळे पर्यायी मार्गांचा वापर करून प्रवास करणाऱ्यांना काहीसा दिलासा मिळू शकतो.
दरम्यान, पश्चिम रेल्वेवर सांताक्रूझ ते गोरेगाव स्थानकांदरम्यान अप आणि डाउन जलद मार्गावर शनिवारी मध्यरात्री १२.३० ते रविवारी पहाटे ४.३० या वेळेत रात्रकालीन ब्लॉक घेण्यात येणार आहे. या काळात जलद लोकल धीम्या मार्गावर वळवण्यात येतील, तर काही लोकल फेऱ्या रद्द राहतील. मात्र, पश्चिम रेल्वेवर रविवारी दिवसा कोणताही ब्लॉक नियोजित नसल्याचे नमूद करण्यात आले आहे. मेगाब्लॉकमुळे प्रवासाच्या वेळेत बदल होऊ शकत असल्याने प्रवाशांनी घराबाहेर पडण्यापूर्वी रेल्वेचे अधिकृत वेळापत्रक तपासावे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.