Mumbai : रात्री चोरी, दिवसा फळ विक्री; मुंबईत फळ विक्रेत्याचा काळा धंदा उघड

संजय गडदे, मुंबई

Mumbai Kandivali Fruit Seller Theft Mira Road News मुंबईत फळ विक्रेत्याच्या नावाखाली सुरू असलेल्या चोरीच्या धक्कादायक प्रकाराचा पर्दाफाश झाला आहे. कांदिवली पूर्व येथील रस्त्यावरील फळांच्या स्टॉल्सवर रात्रीच्या अंधारात चोरी करून तेच फळे दुसऱ्या दिवशी मीरा रोड येथे स्वतःच्या दुकानात विकणाऱ्या आरोपीला समता नगर पोलिसांनी अटक केली आहे. रवी चौरसिया (रा. मीरा रोड) असे आरोपीचे नाव आहे.

पोलिसांच्या माहितीनुसार, चौरसिया रात्री उशिरा बंद असलेल्या स्टॉल्सचे कुलूप तोडून महागडी आणि ताजी फळे चोरी करत असे. ही फळे तो ऑटो-रिक्षाच्या माध्यमातून मीरा रोडला नेत असे आणि दुसऱ्या दिवशी स्वतःच्या स्टॉलवर विक्री करत असे. गेल्या काही महिन्यांपासून हा प्रकार सुरू होता.

कांदिवली पूर्व येथील रामनगर भागातील एका विक्रेत्याने 31 मार्च रोजी चोरीची तक्रार दिली होती. या प्रकरणात सुमारे 12 हजार रुपयांच्या फळांची चोरी झाली होती. याआधीही त्याच परिसरात सुमारे 72 हजार रुपयांची फळे चोरीला गेल्याची माहिती पोलिसांनी दिली.

अनेक विक्रेत्यांच्या तक्रारी आणि सीसीटीव्ही फुटेजच्या आधारे पोलिसांनी तपास सुरू केला. वरिष्ठ पोलीस निरीक्षक जयवंत शिंदे यांच्या मार्गदर्शनाखाली एपीआय योगेश कुमार पीएसआय कोल्हापूर ए एस आय तोंडवलकर, एच सी ननावरे पोलीस कॉन्स्टेबल साळुंखे साबळे आणि भिकले या तपास पथकाने अथक परिश्रम करून आरोपीचा शोध घेतला.

ऑटो-रिक्षाच्या धाग्याद्वारे आरोपीपर्यंत पोहोचण्यात यश आले. चौकशीत आरोपीने गुन्ह्याची कबुली दिली असून, त्याचा एक साथीदार फरार आहे. या प्रकरणात आरोपीला न्यायालयात हजर करण्यात आले असून त्याला दोन दिवसांची पोलीस कोठडी सुनावण्यात आली आहे. पुढील तपास सुरू आहे.