Mumbai : न्यू इयरच्या पार्टीसाठी घरी बोलावलं, लग्नाला नकार दिल्याने वाद; गर्लफ्रेंडने बॉयफ्रेंडचा प्रायव्हेट पार्ट कापला

एकीकडे प्रेमासाठी चंद्र तारे तोडून आणून देईन म्हणणाऱ्या तरुण तरुणींच्या कहाण्या आपण ऐकल्या आहेत. दुसरीकडे हेच प्रेम जर मिळालं नाही तर प्रेमीयुगुलांची अनेकदा चुकीचं पावलं पडताना आपण पाहिली आहेत. अशीच एक थरकाप उडवणारी घटना मुंबईत घडली आहे. लग्नाला नकार दिल्याच्या रागातून एका प्रेयसीने तिच्या प्रियकराचे चक्क प्रायव्हेट पार्ट कापला आहे. या घटनेनंतर जखमी असलेल्या पीडित तरुणाला सायन रुग्णालयात उपचारासाठी दाखल केले आहे. या प्रकरणी वाकोला पोलिसांनी आरोपी महिलेविरोधात गंभीर दुखापत केल्याप्रकरणी आणि धमकी दिल्याप्रकरणी गुन्हा दाखल केला आहे.

मिळालेल्या माहितीनुसार, सदर घटना मुंबईतील सांताक्रुझ पूर्व येथील कलिना परिसरात घडली आहे. पीडित तरुणाचं नाव जोगिंदर लखन महतो (वर्षे ४४) आणि आरोपी महिलेचे नाव कंचनदेवी राकेश महतो (वर्षे २५) असे आहे. जोगिंदर हा जांभळीपाडा परिसरात राहत असून खासगी वाहनचालक म्हणून काम करतो. कंचनदेवी आणि जोगिंदरचे गेले ६ ते ७ महिने प्रेमसंबंध होते. मात्र जोगिंदरचे आधीच लग्न झाले होते. कंचन ही जोगिंदरवर पत्नीला सोडून तिच्यासोबत राहण्याचा व लग्न करण्याचा दबाव टाकत होती. या कारणामुळे जोगिंदर यांच्या कुटुंबात खटके उडत होते. परिस्थिती हाताबाहेर जात असल्याने नोव्हेंबर महिन्यात जोगिंदर मुंबई सोडून बिहारला गेला होता. त्या काळातही कंचन सतत फोन करून मुंबईत परत येऊन लग्न करण्याची धमकी देत असल्याचा आरोप जोगिंदर याने केला आहे. १९ डिसेंबर रोजी जोगिंदर पुन्हा मुंबईत परतले. मात्र, त्यांनी कंचनपासून दूर राहण्याचा निर्णय घेतला होता.

३१ डिसेंबर रोजी रात्री सुमारे १:३० वाजता कंचनने नवीन वर्षाच्या सेलिब्रेशनच्या बहाण्याने जोगिंदरला आपल्या घरी बोलावून घेतले. त्यावेळी घरात कंचन आणि तिची दोन लहान मुले उपस्थित होती. मुले झोपल्यानंतर कंचनने स्वयंपाकघरातील भाजी कापण्याच्या चाकूने जोगिंदरवर अचानक हल्ला करून त्याचा प्रायव्हेट पार्ट कापला. गंभीर जखमी अवस्थेत जोगिंदर कसाबसा आपल्या घरी पोहोचला आणि संपूर्ण प्रकार कुटुंबीय व शेजाऱ्यांना सांगितला. त्यानंतर त्याला तातडीने प्रथम जवळच्या रुग्णालयात, त्यानंतर पुढील उपचारांसाठी सायन रुग्णालयात दाखल करण्यात आले.

दरम्यान घटनेची माहिती मिळताच वाकोला पोलिसांनी घटनास्थळी भेट देत पंचनामा केला. जोगिंदर यांच्या तक्रारीवरून आरोपी कंचनदेवी महतो हिच्याविरोधात गंभीर दुखापत व धमकी दिल्याप्रकरणी गुन्हा दाखल करण्यात आला असून पोलीस पुढील तपास करत आहेत.