Mumbai CJP Protest : अभिनेत्री स्वरा भास्करच्या पतीला मुंबई पोलिसांनी घेतलं ताब्यात, Video पोस्ट करत म्हणाली "अतिशय लाजिरवाणी गोष्ट"

दिल्लीत जंतर मंतर येथे गेले २४ दिवस तरुणांचं आंदोलन सुरु आहे. या आंदोलनाचे पडसाद महाराष्ट्रभर पाहायला मिळाले. मुंबईतील चैत्यभूमीवर देखील हजारोंच्या संख्येने आंदोलकांनी आंदोलन छेडले. या आंदोलनात अभिनेत्री स्वरा भास्करचा पती आणि राजकीय कार्यकर्ते फहाद अहमद देखील उपस्थित होते. या आंदोलनाने हिंसक वळण घेतल्याने अनेकांना पोलिसांनी ताब्यात घेतले. तसेच राजकीय कार्यकर्ते फहाद अहमद यांना देखील पोलिसांनी ताब्यात घेतले. यावेळी पोलिसांनी केलेल्या कारवाईनंतर वातावरण तणावपूर्ण झाले असून या घटनेचे काही व्हिडीओ सोशल मीडियावर वेगाने व्हायरल होत आहेत.

सोमवारी संध्याकाळी स्वरा भास्करने तिच्या सोशल मीडिया अकाऊंटवर या घटनेसंदर्भातील काही व्हिडीओ शेअर केले. एका व्हिडीओमध्ये पोलीस फहाद अहमद यांना घेऊन जाताना दिसत आहेत. या वेळी फहाद पोलिसांना “मला अटक का करत आहात?” असा प्रश्न विचारताना ऐकू येतो. हा व्हिडीओ दुपारी साडेचारच्या सुमारास रेकॉर्ड करण्यात आल्याचे स्वराने नमूद केले आहे.

व्हिडीओ शेअर करताना स्वराने मुंबई पोलिसांच्या कारवाईवर तीव्र नाराजी व्यक्त केली. “मुंबई पोलिसांनी चैत्यभूमीवरून फहाद अहमद आणि इतर आंदोलकांना ताब्यात घेतले असून त्यांना माहीम पोलीस ठाण्यात ठेवण्यात आले आहे. लोकशाही व्यवस्थेसाठी ही अत्यंत दुर्दैवी आणि लाजिरवाणी घटना आहे,” असे तिने आपल्या पोस्टमध्ये म्हटले.

यापूर्वी शेअर केलेल्या आणखी एका व्हिडीओमध्ये फहाद पोलिसांच्या वाहनातून घटनेची माहिती देताना दिसत आहे. शांततापूर्ण आंदोलन करणाऱ्यांवर पोलिसांकडून कारवाई होत असल्याचा आरोप करत त्यांनी समर्थकांना शांततेने आंदोलनस्थळी पोहोचण्याचे आवाहन केले. दरम्यान, आंदोलनादरम्यान काही आंदोलकांना ताब्यात घेण्यात आले असून काही जण जखमी झाल्याचीही माहिती समोर आली आहे. या संपूर्ण प्रकरणामुळे राजकीय वर्तुळात चर्चेला उधाण आले आहे.