Accident News : मुंबईत भीषण अपघात! बेस्ट बसची उभ्या कारला जोरदार धडक, एकाचा मृत्यू

Mumbai Malad Western Expressway Accident News मुंबईतील मालाड पूर्व परिसरात गुरुवारी सकाळी झालेल्या भीषण अपघातात एका ५० वर्षीय व्यक्तीचा मृत्यू झाला. पश्चिम द्रुतगती मार्गावरील पुष्पा पार्क परिसरात बेस्ट बसने उभी असलेल्या कारला जोरदार धडक दिल्याने हा अपघात घडला. सकाळच्या गर्दीच्या वेळी झालेल्या या घटनेमुळे परिसरात मोठी वाहतूक कोंडी निर्माण झाली होती.

मिळालेल्या माहितीनुसार, बेस्ट बस चालक ब्रह्म विष्णू पवार (वय ३३) चालवत होते. बस पुष्पा पार्क परिसरात पोचली असता तिची रस्त्याच्या कडेला उभ्या असलेल्या कारला जोरदार धडक बसली. अपघाताच्या वेळी रामचंद्र निरहू पाल (वय ५०) हे आपल्या कारच्या मागच्या बाजूला उभे होते. धडकेची तीव्रता इतकी मोठी होती की, कार पुढे ढकलली गेली आणि तिने समोर उभ्या असलेल्या दुसऱ्या वाहनाला धडक दिली. यामुळे त्या वाहनाच्या मागील उजव्या बाजूच्या बंपर आणि बॉडीचे नुकसान झाले.

अपघातानंतर पश्चिम द्रुतगती मार्गावर वाहनांच्या लांबच लांब रांगा लागल्या. कामावर जाणाऱ्या हजारो प्रवाशांना वाहतूक कोंडीचा फटका बसला. या अपघातात रामचंद्र पाल गंभीर जखमी झाले. घटनेची माहिती मिळताच पोलीस तातडीने घटनास्थळी दाखल झाले. जखमी पाल यांना उपचारासाठी शताब्दी रुग्णालयात नेण्यात आले. मात्र, सकाळी सुमारे ८.१५ वाजण्याच्या सुमारास रुग्णालयात दाखल करण्यापूर्वीच डॉक्टरांनी त्यांना मृत घोषित केले.

प्रशासन आणि वाहतूक पोलिसांनी अपघातात चक्काचूर झालेली वाहने बाजूला करून वाहतूक सुरळीत करण्यासाठी प्रयत्न केले. दरम्यान, पोलिसांनी अपघाताची नोंद करून तपास सुरू केला आहे. बस चालकाची चौकशी करण्यात येत असून अपघाताचे नेमके कारण शोधले जात आहे. या प्रकरणाचा सविस्तर अहवाल लवकरच सादर केला जाणार असल्याची माहिती पोलिसांकडून देण्यात आली आहे.