मुलुंडमधील डम्पिंग ग्राउंडवर गोल्फ क्लब नव्हे, गरिबांसाठी रुग्णालय, शाळा बांधा; ठाकरेंच्या खासदाराची मागणी

मयूर राणे, साम टीव्ही

मुलुंड येथील डम्पिंग ग्राउंडच्या जागेवर गोल्फ क्लब बनविण्याचा निर्णय मुंबई मनपाने घेतला आहे. त्याबाबत लवकरच कामाला सुरुवात होईल, असे आश्वासन पालिका आयुक्त भूषण गगराणी यांनी दिलं आहे. मुलुंड डम्पिंग ग्राउंडवर गोल्फ क्लब बनवण्यात यावे, अशी मागणी भाजप आमदार मिहीर कोटेचा यांनी केली होती. मात्र ईशान्य मुंबई महाविकास आघाडीचे खासदार संजय दिना पाटील यांनी या निर्णयाला विरोध केला आहे. गोल्फ क्लबऐवजी या ठिकाणी क्रीडा संकुल, महाविद्यालय, सर्व सुविधांनी सुसज्ज असे रुग्णालय बांधण्यात यावे अशी मागणी त्यांनी केली आहे.

मुलुंड येथील डम्पिंग ग्राउंडवर लाखो टन कचरा अद्यापही पडलेला असून त्याला उचलण्याचे काम चालू आहे. त्यानंतर या जागेवर गोल्फ क्लब बनविण्यात यावे, अशी मागणी भाजपा आमदार मिहीर कोटेच्या यांनी केली होती. त्यानुसार नुकत्याच झालेल्या बैठकीत हा निर्णय घेण्यात आला असून डम्पिंग ग्राउंड च्या जागेवर गोल्फ क्लब बनवण्याबाबत लवकरच प्रक्रिया सुरू केली जाईल, असे पालिका आयुक्त भूषण गगरांनी यांनी सांगितले.

तत्पूर्वी, ईशान्य मुंबईमध्ये रुग्णालयाची अवस्था पाहता या ठिकाणी सर्व सुविधांनी सुसज्ज असे रुग्णालय या डंपिंग ग्राउंडवर व्हावे तसेच शाळा, महाविद्यालय, क्रीडा संकुल बनविण्यात यावे अशी मागणी ईशान्य मुंबई महाविकास आघाडीचे खासदार संजय दिना पाटील यांनी केली होती.

मात्र या ठिकाणी गोल्फ क्लब बनवण्याचा निर्णय घेतल्याने हा खेळ अति श्रीमंत लोकांचा असल्याने त्याचा सर्वसामान्य लोकांना काय फायदा होईल असा प्रश्नही त्यांनी उपस्थित केला. त्यामुळे स्थानिक लोकांनीही या निर्णयाला विरोध केला असून या ठिकाणी गोल्फ क्लब ऐवजी रुग्णालय, शाळा, कॉलेज बांधण्यात यावे अशी मागणी त्यांनी केली आहे.