Lalbaugcha Raja: लालबागचा राजाच्या मिरवणुकीत चोरांनी केले हात साफ, १०० जणांचे मोबाइल- सोनसाखळी चोरीला

लालबागच्या राजाची विसर्जन मिरवणूक ही गणेश भक्तांसाठी आकर्षणाचा केंद्रबिंदू असते. ही मिरवणूक पाहण्यासाठी लाखो भाविक सहभागी होत असतात. लालबाग ते गिरगाव चौपाटीपर्यंत लालबागचा राजाची विसर्जन मिरवणूक असते. यावर्षी लालबागचा राजाची विसर्जन मिरवणूक जवळपास ३२ ते ३५ तास चालली. या मिरवणुकीमध्ये लाखोंपेक्षा जास्त गणेशभक्त सहभागी झाले होते. या गर्दीमध्ये चोरांनी हात साफ केले.चोरट्यांनी भाविकांचे मोबाइल आणि सोनसाखळ्या चोरी केल्या.

पोलिसांनी दिलेल्या माहितीनुसार, यावर्षी लालबागचा राजाच्या विसर्जन मिरवणुकीमध्ये मोबाइल चोरीच्या १०० पेक्षा अधिक घटना घडल्या. काळाचौकी पोलिस ठाण्याबाहेर तक्रार दाखल करण्यासाठी भाविकांनी गर्दी केली आहे. आतापर्यंत १० जणांच्या तक्रारी दाखल करून घेतल्या गेल्या आहेत. त्यामधील चोरी झालेले ४ मोबाइल जप्त करण्यात आले आहेत. याप्रकरणी चोघांना अटक करण्यात आली आहे.

मोबाइल चोरीसोबत सोनसाखळ्यांची देखील चोरी झाली आहे. या प्रकरणी ७ तक्रारी दाखल करण्यात आल्या आहेत. दोन सोन्याच्या साखळी जप्त करण्यात आल्या आहेत. या प्रकरणी १२ जणांना अटक केली आहे. मुंबईच्या भोईवाडा पोलिसांनी ड्रोनच्या माध्यमातून अनेक गुन्हे देखील दाखल केले आहेत. यावर्षी विसर्जन मिरवणुकीत चोरांचा सुळसुळाट पाहायला मिळाला.

दरम्यान, गणपती विसर्जनाला गालबोट लागले. गणपती विसर्जनादरम्यान घडलेल्या वेगवेगळ्या घटनांमध्ये १२ जणांचा मृत्यू झाला. गणपती विसर्जन करत असताना पाण्याचा अंदाज न आल्यामुळे यामधील अनेकांचा मृत्यू झाला. तर काही जण वाहून गेले आहेत. ते अद्यापही बेपत्ता आहेत. त्यांचा शोध घेतला जात आहे. त्यामुळे मृतांचा आकडा आणखी वाढण्याची शक्यता आहे.