Kalyan News: औषधाच्या दुकानाला पोलीस अधिकाऱ्याचे नाव; फलकाची शहरात जोरदार चर्चा

अभिजीत देशमुख

Kalyan News: देशात कुठेही महापुरुष, देव-देवता,आई वडील,मुलांच्या नावाने दुकाने सुरु केली जातात. कल्याणमध्ये मात्र एका मेडिकल व्यावसायिकाने एका पोलीस अधिकाऱ्याच्या नाव औषधाच्या दुकानाला दिले आहे. या दुकानाच्या फलकाची सर्वत्र चर्चा सुरू आहे. (Latest Marathi News)

कल्याण एपीएमसी मार्केटमध्ये मेडिकल शॉपला चक्क बाजारपेठ पोलीस ठाण्याचे वरिष्ठ पोलीस निरीक्षक सुनील पवार यांचं नाव देण्यात आले आहे. सुनील पवार हे निष्ठावान,कर्तव्यदक्ष व माणुसकी असलेले पोलिस अधिकारी आहेत. एक चांगला माणूस असल्याने हे नाव दिल्याची माहिती व्यावसायिक शहानवाज मोमीन यांनी सांगितले. शहरात या नावाची चर्चा शहरात रंगली आहे.

पोलीस आणि सामान्य जनता यांच्यात अंतर वाढत असून पोलिसांबद्दल अनामिक भीती नागरिकांच्या मनात असल्याचे बोलले जाते. कल्याणमध्ये मात्र एका पोलीस अधिकाऱ्याने काम करण्याच्या पद्धतीने नागरिकांच्या मनात पोलिसांबद्दल आदर भावना निर्माण झाल्याचे दिसून येते.

कल्याणमध्ये राहणारे शहानवाज मोमीन हे व्यावसायिक आहेत. कल्याणच्या एपीएमसी मार्केटमध्ये त्यांचा गाळा आहे. शहानवाज मोमीन हे त्याठिकाणी मेडिकल शॉप सुरु करणार आहे. त्यांनी या दुकानाचे नाव 'श्री. सुनिल पवार' असे दिलं आहे. सुनिल पवार हे बाजारपेठ पोलिस ठाण्याचे वरिष्ठ पोलीस निरिक्षक आहेत.

कर्तव्यदक्ष पोलिस अधिकरी म्हणून त्यांची ओळख आहे. कल्याणमधील व्यावसायिक शहानवाज मोमीन यांनी सुनिल पवार यांच्या कामगिरी आणि त्यांची माणुसकी पाहून दुकानाला त्यांचे नाव दिले आहे.