Accident News: पुणे-नाशिक महामार्गावर भीषण अपघात; लक्झरी बसची कंटेनरला मागून धडक, ४०-५० प्रवासी गंभीर जखमी

ठाणे-बेलापूर मार्गावर आणि पुणे-नाशिक महामार्गावर या दोन भीषण अपघातांच्या घटनांनी खळबळ उडवली आहे. या दोन्ही दुर्घटनांमध्ये अनेक जखमी असून वाहनचालकांच्या वेगावरील नियंत्रण सुटल्याने हे अपघात झाल्याची प्राथमिक माहिती समोर आली आहे. ठाणे बेलापूर मार्गावर डंपर थेट उड्डाणंपुलावरून खाली पडल्याची बातमी आहे.

पुणे-नाशिक महामार्गावर आळेफाटा बायपासजवळ लक्झरी बस आणि कंटेनरमध्ये झालेल्या भीषण अपघाताने अनेक प्रवासी जखमी झाले आहेत. पुण्याकडे जाणारी लक्झरी बस पुढे जात असलेल्या कंटेनरला मागून धडकली. या अपघातात बसमधील 40 ते 50 प्रवासी गंभीर जखमी झाले आहेत. जखमी प्रवाशांना तातडीने उपचारासाठी जवळच्या खासगी रुग्णालयात हलवण्यात आले आहे. धडक एवढी जोरदार होती की, बसचा पुढील भाग पूर्णपणे चिरडला गेला असून, घटनेमुळे वाहतुकीवरही परिणाम झाला आहे.

दरम्यान, ठाणे-बेलापूर मार्गावरील रबाळे उड्डाणपुलावरून एक डंपर थेट खाली कोसळला. हा डंपर खालील रस्त्यावर जोरात आदळल्याने मोठा आवाज झाला आणि घटनास्थळी गोंधळ उडाला. या अपघातात दोन जण जखमी झाल्याचे समजते. डंपरच्या चालकाचे वेगावर नियंत्रण सुटल्याने हा अपघात झाल्याचा प्राथमिक अंदाज वर्तवला जात आहे. जखमींना तातडीने रुग्णालयात दाखल करण्यात आले असून त्यांच्यावर उपचार सुरू आहेत. या घटनेमुळे परिसरातील वाहतूक काही काळ विस्कळीत झाली होती.

या दोन्ही अपघातांमुळे सुरक्षित वाहनचालना आणि वेगावर नियंत्रण ठेवण्याचे महत्त्व पुन्हा अधोरेखित झाले आहे. पोलिसांनी दोन्ही घटनांमध्ये तपास सुरू केला असून अपघाताचे नेमके कारण शोधण्याचा प्रयत्न केला जात आहे. या दुर्घटनांमुळे परिसरातील नागरिकांमध्ये हळहळ व्यक्त केली जात असून जखमींच्या लवकर बऱ्या होण्यासाठी प्रार्थना केली जात आहे.