कडाक्याच्या उन्हाळ्यात अवकाळीचा तडाखा; राज्यात तीन दिवस पावसाचा इशारा

सागर आव्हाड, साम टीव्ही

पुणे: राज्याच्या बहुतांश भागात भारतीय हवामानशास्त्र विभागाने (आयएमडी) उष्णतेच्या लाटेचा इशारा दिला असताना, पुण्यातही गेल्या दोन दिवसांत तापमानाचा पारा ४० अंशांजवळ रेंगाळला आहे, तर उपनगरात तापमान ४१ अंशांच्या पुढे पोहोचले आहे. महाराष्ट्रावर असलेली प्रत्यावर्ती चक्रीय वातस्थिती आणि पूर्वेकडून येणारे वारे यांमुळे कोकणामध्ये उष्ण आणि दमट वातावरणस्थिती निर्माण झाली आहे. आज आणि उद्या कोकणात ही स्थिती कायम राहू शकते; तर मध्य महाराष्ट्र, मराठवाडा आणि विदर्भात तुरळक ठिकाणी उष्णतेच्या लाटेचा इशारा देण्यात आला आहे.

अकोल्यात पारा ४४ अंशांवर

राज्यात सर्वाधिक कमाल तापमान अकोला येथे ४४ अंश सेल्सिअस नोंदले गेले. अमरावती येथे ४३.८, बुलडाणा येथे ४१.६, चंद्रपूर येथे ४२.२, गोंदिया येथे ४१.१, नागपूर येथे ४२.२, वाशिम येथे ४२.४, वर्धा येथे ४३.५; तर यवतमाळ येथे ४२.६ अंश सेल्सिअस कमाल तापमानाची नोंद झाली.

रस्त्यावरील विक्रेते, बांधकाम मजूर, वाहतूक पोलिस, स्वच्छता कर्मचारी, डिलिव्हरी कामगार, रिक्षाचालक आदी बाहेर काम करणाऱ्यांना मार्गदर्शन करण्यात आले आहे. भारतीय हवामान विभागाच्या येलो, अल्ट्रा ऑरेंज आणि रेड ॲलर्टनुसार कामाचे वेळापत्रक बदलणे, पाण्यासाठी विश्रांती, पाण्याचे बूथ, ओआरएस वितरण, सावलीची व्यवस्था आणि आरोग्य सुविधा मजबूत करणे यांसारख्या उपाययोजनांचा यात समावेश करण्यात याला आहे.