Maharashtra Politics : पुण्यात शरद पवारांना दुहेरी धक्का, दोन दिग्गज नेत्यांचा भाजपमध्ये पक्षप्रवेश

• पुण्यात शरद पवारांचा दुहेरी धक्का

• दोन दिग्गज नेत्यांनी साथ सोडली

• दोघांनीही भाजपमध्ये केला प्रवेश

रोहिदास गाडगे, साम टीव्ही, प्रतिनिधी

Maharashtra : आगामी स्थानिक स्वराज्य संस्थांच्या पार्श्वभूमीवर राज्यातील सर्व पक्षांनी जय्यत तयारी केली आहे. जानेवारी २०२६ पर्यंत निवडणूक प्रक्रिया पूर्ण करण्याचे सर्वोच्च न्यायालयाने आदेश दिले आहेत. त्यामुळे पुढच्या काही महिन्यात निवडणूका होणार आहेत. निवडणुकीपूर्वी अनेक राजकीय पक्षांमध्ये नेते, पदाधिकाऱ्यांची इनकमिंग आणि आउटगोईंग सुरु असल्याचे पाहायला मिळत आहे.

निवडणुकीपूर्वी पुण्यात राष्ट्रवादी काँग्रेस शरदचंद्र पवार पक्षाला मोठा धक्का बसला आहे. पुण्याच्या शिरूरमधील दोन दिग्गज नेत्यांनी पक्षातून बाहेर पडण्याचा निर्णय घेतला आहे. त्यांनी भारतीय जनता पक्षामध्ये प्रवेश केला आहे. आज (१४ ऑक्टोबर) त्यांचा पक्षप्रवेशाचा कार्यक्रम संपन्न झाला. या प्रवेशामुळे पुण्यात भाजपची शक्ती आणखी वाढल्याचे म्हटले जात आहे.

मिळालेल्या माहितीनुसार, पुणे जिल्हा परिषदेचे माजी सदस्य शेखर पाचुंदकर यांच्यासह रांजणगाव देवस्थान ट्रस्टच्या अध्यक्षा आणि माजी जिल्हा परिषदद सदस्या स्वाती पाचुंदकर यांनी भाजपमध्ये प्रवेश केला. मुंबईतील भाजप मुख्यालयामध्ये त्यांचा पक्षप्रवेश झाला. भाजप प्रदेशाध्यक्ष रवींद्र चव्हाण यांच्या उपस्थितीत हा कार्यक्रम पार पडला.

या पक्षप्रवेशाच्या वेळी इतर पक्षातील नेत्यांनीही भाजपचे कमळ हाती घेतले. कार्यक्रमामध्ये शेखर पाचुंदकर यांनी नाव न घेता राष्ट्रवादी काँग्रेसचे नेते दिलीप वळसे पाटील यांच्यावर निशाणा साधला. ऐन जिल्हा परिषद निवडणुकीच्या तोंडावर शेखर पाचुंदकर आणि स्वाती पाचुंदकर यांच्या प्रवेशाने भाजपची पुणे जिल्ह्यात शक्ती वाढली आहे.