Maharashtra Politics: कला केंद्रात भावाचा गोळीबार, अजितदादांचा आमदार भरसभेत ढसाढसा रडला

Summery:

• पुणे जिल्ह्यातील दौंडमध्ये कला केंद्रात गोळीबाराची घटना घडली होती.

• गोळीबार आमदार शंकर मांडेकर यांच्या भावाने केला होता.

• आमदार शंकर मांडेकर यांनी वाढदिवसानिमित्त आयोजित केलेल्या कार्यक्रमात वारकऱ्यांची माफी मागितली

• वारकरी संप्रदायाची माफी मागताना ते भावुक झाले. याचा व्हिडीओ व्हायरल होत आहे.

दौंडच्या यवतमधील चौफुला येथील कला केंद्रामध्ये गोळीबराची घटना घडली होती. भोर-मुळशी मतदारसंघाचे राष्ट्रवादी काँग्रेस अजित पवार गटाचे आमदार शंकर मांडेकर यांच्या भावाने हा गोळीबार केला होता. या घटनेमुळे पुणे जिल्ह्यात खळबळ उडाली होती. या प्रकरणी पोलिसांनी कारवाई देखील केली होती. आता या प्रकरणावर प्रतिक्रिया देताना आमदार शंकर मांडेकर यांनी भावाने केलेल्या कृत्याबाबत दु:ख व्यक्त केले. वाढदिवसाच्या कार्यक्रमात भावाच्या कृत्याबाबत बोलताना शंकर मांडेकर रडले आणि त्यांनी वारकरी संप्रदायाची माफी देखील मागितली.

शंकर मांडेकर यांच्या वाढदिवसानिमित्त कार्यक्रमाचे आयोजन करण्यात आले होते. वारकरी संप्रदायाच्या लोकांच्या उपस्थितीत त्यांचा वाढदिवसाचा कार्यक्रम पार पडला. या कार्यक्रमात वारकऱ्यांशी संवाद साधताना ते भावुक झाले आणि त्यांच्या डोळ्यात पाणी आले. त्यांची बायको देखील यावेळी रडल्या. त्यांनी सांगितले की, 'ज्यावेळेस ही घटना घडली त्यावेळेस माझ्या सर्व वारकऱ्यांनी मला फोन करून सांगितलं. ज्याने चुकीचं काम केलं ते त्याचं बघतील तुम्ही तुमचं काम करा. मी संपूर्ण वारकऱ्यांची माफी मागतो ज्यांनी चुकी केली त्याचा त्रास त्यांना होतोय आणि त्या चुकीची फळ त्यांना मिळत आहेत.'

शंकर मांडेकर म्हणाले की, 'मी नेहमी सांगतो की मी माळकरी नाही पण वारकऱ्यांनी आणि माळकरांनी माझ्यावर एखाद्या साधुसंताप्रमाणे प्रेम केलं आहे. याची जाणीव मला आहे. माझ्या कुटुंबातील सगळे सदस्य इथे आहेत. कैलास मांडेकर यांचे नाव घ्यायला मी मुद्दाम मागे ठेवले. कारण काही काळापूर्वी एक चुकीची घटना घडली. त्यानंतर पत्रकारांनी मला घेरलं आणि विचारलं तुम्ही टोपी घालून समाजकारण आणि राजकारण करता तुम्ही स्वतःला वारकरी समजता मग हे कसं घडलं? मी वारकरी नाही पण वारकऱ्यांचं माझ्यावर खूप प्रेम आहे आणि माझी श्रद्धा वारकऱ्यांवर आहे. जे चुकीचं घडलंय त्याला काय शासन द्यायचं ते माझे वारकरी देतील.'

'माझे जे भावंड आहेत ते समाजामध्ये माझे प्रतिनिधी म्हणून काम करतात. मला या गोष्टीचं वाईट वाटत आहे.' असं म्हणत शंकर मांडेकर यांना अश्रू अनावर झाले. 'या समाजात मी कधीच कोणतच चुकीचं काम करणार नाही. शरीर हे बळदंडच असलं पाहिजे. मात्र जे चुकीचं काम करतात त्यांना मुळासकट उपटून टाकलं पाहिजे. कारण ही समाजाला लागलेली कीड आहे. ही कीड नष्ट करण्याचं काम मी करत आहे. मी वारकरी संप्रदायाला जाहीर सांगतो वारकऱ्यांना कधी कमीपणा येईल असं मी वागणार नाही. माझ्या भावाची चूक झाली मात्र भविष्यात अशी चूक होणार नाही याची मी काळजी घेईल असा विश्वास मी वारकऱ्यांना देतो. या कालावधीमध्ये वारकऱ्यांसोबत मला काही नेत्यांची साथ लाभली. विरोधकांनी टीका केली मात्र नेत्यांनी हे स्पष्ट सांगितलं की मांडेकरांची चुकी नसेल मी त्यांना दोषी धरणार नाही. ही नेत्यांनी मला दिलेली ताकद आहे. याची जाण ठेवूनच आगामी काळात माझं काम सुरू राहील .', असं म्हणत शंकर मांडेकर यांनी अप्रत्यक्षरीत्या अजित पवारांचे आभार मानले.