MNS-Shivsena Alliance: मोठी बातमी! मनसे-शिवसेना युतीवर शिक्कामोर्तब, संजय राऊतांनी तारीख अन् वेळ सांगितली

Summary:

• शिवसेना -मनसे युतीवर अखेर शिक्कामोर्तब झाला

• शिवसेना-मनसे युतीची घोषणा उद्या होणार

• उद्या दुपारी १२ वाजता ठाकरे बंधू युतीची घोषणा करणार

• खासदार संजय राऊत यांनी ट्वीट करत दिली माहिती

शिवसेना-मनसे युतीवर अखेर शिक्कामोर्तब झाला. मनसे-शिवसेना युतीची घोषणा उद्या होणार आहे. उद्या दुपारी १२ वाजता राज ठाकरे आणि उद्धव ठाकरे एकत्र येत युतीची घोषणा करणार आहेत. शिवसेना ठाकरे गटाचे खासदार संजय राऊत यांनी सोशल मीडिया प्लॅटफॉर्म एक्सवर पोस्ट करत याबाबत माहिती दिली. संजय राऊत यांनी या पोस्टमध्ये राज ठाकरे आणि उद्धव ठाकरे यांचा एकत्र असलेला फोटो शेअर करत कॅप्शनमध्ये 'उद्या १२ वाजता' असे लिहिले. या ३ शब्दात त्यांनी उद्या युतीची घोषणा होणार असल्याचे जाहीर केले.

अखेर शिवसेना-मनसे युतीचे ठरले. गेल्या अनेक दिवसांपासून मनसे-शिवसेनेच्या नेत्यांपासून पदाधिकारी आणि कार्यकर्ते ज्या क्षणाची आतुरतेने वाट पाहत होते तो क्षण अखेर आला आहे. मनसे-शिवसेना युतीचा मुहूर्त अखेर ठरला असून युतीबाबत निर्णय झाला आहे. उद्या दुपारी १२ वाजता ठाकरे बंधू एकत्र येत युतीची अधिकृत घोषणा करणार आहेत. खरं तर आज युतीची घोषणा करण्यात येणार असल्याची माहिती सोमवारी सुत्रांनी दिली होती. पण याबाबत आज संजय राऊत यांनी अधिकृत माहिती सोशल मीडियावर पोस्ट करत दिली.

संजय राऊत यांनी सोशल मीडियावर ठाकरे बंधूंचा फोटो पोस्ट केला आहे. या फोटोमध्ये राज ठाकरे उद्धव ठाकरेंना पुष्पगुच्छ देताना दिसत आहे. या फोटोत ठाकरे बंधूंच्या चेहऱ्यावर स्मित हास्य दिसत आहे. ठाकरे बंधूंचा हा फोटो पोस्ट करत संजय राऊत यांनी उद्या १२ वाजता ऐवढेच लिहिले आहे. त्यामुळे उद्या दुपारी १२ वाजता ठाकरे बंधू युतीची घोषणा करणार हे निश्चित झाले आहे.

संजय राऊत यांच्या या ट्वीटनंतर राजकीय वर्तुळात चर्चांना उधाण आले आहे. ठाकरे बंधू एकत्र आल्यानंतर राज्याच्या राजकारणात नवं समिकरण तयार होईल अशी चर्चा सुरू झाली आहे. ठाकरे बंधू एकत्रित येत आगामी महापालिका निवडणुका एकत्रित लढणार आहेत. मनसे-शिवसेना युतीसाठी गेल्या काही दिवसांपासून दोन्ही पक्षांच्या प्रमुख नेत्यांमध्ये चर्चा देखील सुरू होत्या. तसंच मनसे आणि शिवसेना नेत्यांमध्ये जागा वाटपाबाबत देखील चर्चा झाली असल्याचे सांगितले जात आहे. त्यांच्यात असलेला जागा वाटपाचा तिढा सुटला असल्याची माहिती समोर आली आहे.